VOV4.Jarai - Mơguah lơ 1/12, ƀơi hơdôm bôh tơring čar kual Tŏng krah dêh čar không hơjan, ia ling dăo ƀơi hơdôm bôh ia krông glăi hrŏ trun kaih. Hơjan ia ling dăo ngă lip prong, ngă 9 čô mơnuih djai. Gong gai hơdôm bôh tơring čar iâu pơhrui khul mơnuih gum djru tañ mơnuih ƀôn sang hơkrŭ pơsir răm rai, hluh gah jơlan gah rai. Ƀơi tơring glông kual čư̆ siăng Nam Trà My, tơring čar Quảng Nam, hơjan prong sui hrơi rơgao hmâo lu anih lŏn tơhlom anet prong. Khul mơnuih ƀơi plơi pla hrom hăng mơnuih ƀôn sang đing nao hơkrŭ pơsir jăng jai kiăng mơnuih hăng gơnam mă yua nao rai. Hơjan ia ling dăo ƀơi tơring čar Bình Định ngă 3 čô mơnuih djai, 2 čô mơnuih rơka hăng rơbêh kơ 31 rơbâo bôh sang ia ling lip, 1.250 drơi mơnŭ bip ia kor đuăi. Ră anai, gơnong bruă jơlan nao rai tơring čar anai glăk iâu pơhrui hơdôm bôh anom pơkra pơgang jơlan nao rai kiăng hơkrŭ pơkra ƀơi anih răm rai pơ̆ hơdôm ară jơlan. Hơjan ia ling dăo ƀơi tơring čar Phú Yên hmâo ngă laih 6 čô mơnuih djai. Hơjan prong hrom hăng hơdôm bôh drai ia pơkĕ apui pơđoh tơbiă ia ngă rơbêh kơ 28 rơbâo bôh sang anô̆ mơnuih ƀôn sang ƀơi hơdôm bôh tơring glông Tuy An, Phú Hòa, Đồng Xuân hăng plơi prong Tuy Hòa ia lip prong./.

Siu H’ Prăk: Pô pơblang