VOV4.Jarai - Tlam lơ 29/10, ƀơi Ƀirô Kơnuk kơna, Khua apăn bruă Ping gah, Kơ-iăng Khua dêh čar Lê Minh Khái tŭ jum Khua ding jum ia jâu Kuwait glăk rai čuă hăng mă bruă pơ dêh čar Việt Nam. Kơ-iăng Khua dêh čar ơi Lê Minh Khái brơi thâo, ră anai klin Covid-19 ƀơi Việt Nam glăk pơgang klă laih. Việt Nam glăk ƀơƀrư̆ phư glăi hơdip tui hơđăp, ngă tui tơlơi črâo trun “hơdeč hmar hluai tui tơlơi sit nik, pơgang kjăp klin Covid-19”. Kơ-iăng khua dêh čar pơpŭ bơni bruă djru brơi vaccine pơgang klin Covid-19 mơng Khua dêh čar Kuwait brơi kơ Việt Nam hăng brơi thâo tơlơi anai amra djru brơi Việt Nam tañ pơwŏt glăi hơdip tui hơđăp. Lăi nao kơ bruă Việt Nam bưp lu tơlơi lông lơ̆m klin COvid-19 lar hyu, Khua ding jum ia jâu Kuwait brơi thâo, ƀrô tal anai, Khua dêh čar Kuwait hơmâo pơsit djru brơi Việt Nam 500.000 liều vaccine pơgang klin Covid-19, laih dong Kơnuk kơnuk Kuwait ăt sem lăng tŏ tui djru brơi Việt Nam amăng bruă pơgang klin.

Siu Đoan: Pơblang