VOV4.Jarai - 76 ring bruă, hơdră ngă bruă hmư̆ hing hơmâo pơpŭ bơni amăng Hơdrôm hră mah rơgơi pơčeh phrâo Việt Nam thun 2021. Hrơi ngă lơphet ba pơƀuh pơphun amăng tlam lơ 25/11, ƀơi Hà Nội, yua Jơnum min djŏp djuai ania mơnuih mơnam Việt Nam ngă hrŏm hăng Ding jum boh thâo ia rơgơi phrâo hăng Khul mơnuih apăn bruă kơsem min boh thâo kĭ thuâ̆t Việt Nam pơphun. 76 ring bruă, hơdră ngă bruă hơmâo pơpŭ amăng Hơdrôm hră mah rơgơi pơčeh phrâo Việt Nam thun anai hơmâo ruah mă mơng 151 ring bruă, hơdră ngă bruă pơčeh phrâo boh thâo yua hơdôm ding jum, anom bruă, tơring čar, ƀon prong ba pơƀuh. Lăp đing nao Hơdrôm hră mah rơgơi pơčeh phrâo Việt Nam thun 2021 hơmâo pơpŭ bơni 6 ring bruă kơsem min boh thâo gah xã hội - nhân văn. Biă ñu, amăng mrô hơdôm ring bruă hơmâo pơpŭ hơmâo hơdôm bruă pơčrah phrâo mơng mơnuih mă bruă kiăng pơkra gơnam lu, klă, tŭ yua kiăng pơđĭ kyar tơlơi bơwih ƀong - mơnuih mơnam, pơhlôm pơgang lŏn ia, rơnuk rơnua, pơgang ba ayuh hyiăng lŏn adai.

Siu H’Mai: Pơblang