VOV4.Jarai - Hrơi anai, lơ 10/6, Anom bruă khua pơ ala mơnuih ƀon sang dêh čar pơphun jơnum mă tơlơi pơhing, lăi pơthâo Tơlơi pơtrun mơng Anom bruă ruah khua Dêh čar kơ hră čih anăn ƀing dưi ngă khua pơ ala mơnuih ƀon sang dêh čar tal 15. Khua čih pioh hră pơ-ar Ƀirô khua pơ ala mơnuih ƀon sang dêh čar, Khua anom bruă ruah khua dêh čar ơi Bùi Văn Cường brơi thâo, hrơi plĕ hră ruah khua lơ 23/5 phrâo rơgao, hơmâo rơbêh 69 klăk čô mơnuih nao plĕ hră ruah pô pơ ala mơnuih ƀon sang dêh čar hăng pơ ala mơnuih ƀon sang djŏp gưl rơwang thun 2021-2026. Anai lĕ tal plĕ hră prong hloh mơng hlâo truh ră anai, mah pơphun amăng hrơi mông hơmâo klin Covid-19. Mrô mơnuih nao plĕ hră lu biă 99,60%, pơsit tơlơi pơmin, tơlơi khăp kơ lŏn ia hăng tơlơi đăo gơnang mơng mơnuih ƀon sang hăng Ping gah, Kơnuk kơna ta. Boh than ba glăi, mrô mơnuih nao plĕ hơmâo ruah djŏp mrô khua pơ ala mơnuih ƀon sang dêh čar tui tơlơi phiăn; hơmâo ruah 99,87% mrô khua pơ ala mơnuih ƀon sang gưl tơring čar; 99,81% mrô khua pơ ala mơnuih ƀon sang tơring glông hăng 98,91% mrô khua pơ ala mơnuih ƀon sang să pơhmu hăng mrô kiăng ruah tui tơlơi phiăn.

Siu H’Mai: Pơblang