VOV4.Jarai - Mơguah lơ 1/4, Anom bruă pơhlôm bơkơnar đah rơkơi hăng đah kơmơi, Ding jum bruă mă, tơhan rơka - mơnuih mơnam laih dong anom bruă mơng Sang gum hơbit djop dêh čar hăng pơhlôm bơkơnar đah rơkơi hăng đah kơmơi (UN Women) lăi pơthâo anăn hơdôm anom bruă, khul grup djru brơi đah kơmơi hăng ƀing čơđai arăng kơtư̆ juă hăng ngă sat amăng đơ đam dêh čar. Hơmâo pơjing hăng pơgiong amăng 6 blan, hơdôm hră čih anăn amra pơƀut glăi hơdôm anom bruă, khul grup djru brơi ƀing đah kơmơi hăng čơđai arăng kơtư̆ juă mơng 63 tơring čar, ƀôn prong wŏt gưl gơnong dlông.

Hơdôm bruă gum djru mơng hơdôm anom bruă, khul grup amăng hră čih anăn hluai tui jơlan hơdră bruă mă hrŏm amăng rŏng lŏn tơnah kơ hơdôm anŏ gum djru brơi mơnuih arăng kơtư̆ juă yua Sang gum hơbit djop dêh čar hăng Ding jum bruă mă, tơhan rơka hăng mơnuih mơnam pơphun. Tui hăng hơduah ĕp kơ bruă arăng kơtư̆ juă, taih amang hăng đah kơmơi ƀơi Việt Nam thun 2019, amăng 3 čô amra hơmâo 2 čô arăng kơtư̆ juă, mă pơgô̆, ngă bơdjơ̆ nao tơlơi hơdip yua mơng rơkơi ƀudah gơyut. Samơ̆ abih bang đah kơmơi (90,4%) ƀu nao ĕp hơdôm anih gum djru ôh.

Siu Đoan: Pơblang