VOV4.Jarai - Tlam tom brơi, lơ 30/6, ƀơi Anom bruă Pôr pơhiăp Dêh čar - 58 Quán Sứ, Hà Nội, Gong phun jua pơhiăp Việt Nam lăi pơthâo hăng brơi hră pơsit mơng Khua dêh čar ruah Khua gong phun jua pơhiăp Việt Nam. Ƀơi mông ngă lơphet, tui tơlơi jao bruă mơng Khua dêh čar, Ding kơna Ding jum kơđi čar, Kơ-iăng khua dêh čar ơi Phạm Bình Minh brơi Hră pơsit mơng Khua dêh čar ruah Khua gong phun jua pơhiăp Việt Nam kơ ơi Đỗ Tiến Sỹ. Pơpŭ hăng hmư̆ tui tơlơi pơgôp hiăp yôm hăng tơlơi jao bruă mơng Kơ-iăng khua dêh čar ơi Phạm Bình Minh, Khua gong phun jua pơhiăp Việt Nam ơi Đỗ Tiến Sỹ brơi thâo, amăng hrơi blan pơ anăp, Gong phun  jua pơhiăp Việt Nam amra gir mă yua boh thâo phrâo tañ hloh, mă yua kĭ thuâ̆t phrâo, kơsem min, mă yua măi mok phrâo pơkra jơlan hơdră tơlơi pơhing, pôr pơhiăp, pơdah rup; pơsit bruă ngă hăng kiăo tui tơlơi pơtrun kơ bruă čih hră pơhing lĕ pơhlôm tơlơi pơhing khŏm sit, tañ, hơmâo pô pơsit brơi; pơsit tơlơi gơgrong bruă sa amăng hơdôm anom bruă pôr pơhing, čih hră pơhing phun mơng Ping gah, Kơnuk kơna ba jơlan kiăng mơnuih ƀon sang pơđing hmư̆ tơlơi pơhing sit.

Siu H’Mai: Pơblang