VOV4.Jarai - Mơguah lơ 2/7, ƀơi Hà Nội, Anom bruă Khua mir sir pơphun jơnum hăng ƀing mă tơlơi pơhing phrâo lăi pơthâo tơlơi pơsit kơ bruă pơklaih mơnă hlâo hrơi pơkă thun 2021 mơng Khua mir sir dêh čar Việt Nam. KHua anom bruă Khua mir sir dêh čar Lê Khánh Hải git gai mông jơnum. Tui tơlơi pơsit mơng Khua mir sir, thun blan ngă tui kơđi mă krư̆ kiăng kơ pơklaih mơnă hlâo hrơi pơkă truh lơ 31 blan 8 thun 2021. Ƀing mơnuih amra pơklaih hlâo hrơi pơkă hơmâo: mơnuih glăk krư̆ hơmâo pơkă thun blan, mơnuih krư̆ truh djai ba amra hrŏ trun jing krư̆ tui thun blan, ƀing mơnuih glăk krư̆ jang jai tui tơlơi ngă soh. Yua anun anai lĕ tal blung a dong mơng hrơi hơmâo Tơlơi phiăn pơklaih mơnă hlâo hrơi pơkă čih pơkra glăi amăng thun 2018, Khua mir sir dêh čar hơmâo pơsit pơklaih mơnă hlâo hrơi pơkă tui tơlơi khăp pap ană mơnuih mơng Ping gah, Kơnuk kơna hăng tui gru grua hơdip hiam klă amăng dêh čar ta hăng ƀing ngă soh lơ̆m mă krư̆, pơsur ƀing gơñu gir run hrăm, hơdip hiam klă lơ̆m tơbiă mơng sang krư̆ amra jing mơnuih hơmâo pran thâo gum pơgôp.

Siu Đoan: Pơblang