VOV4.Jarai - Tlam mơmot lơ 25/8, ƀơi Sang bruă Kơnuk kơna, Khua dêh čar ơi Phạm Minh Chính jơnum kơ bruă pơgang klin Covid-19 hăng lăi pơthâo tơlơi pơsit ngă kơjăp tui Anom bruă git gai pơhlôm, pơgang klin Covid-19. Tui hăng tơlơi pơtrun mrô 1438/QĐ-TTg, Khua dêh čar ơi Phạm Minh Chính ngă Khua Anom git gai. Anom git gai pơgang klin anai hơmâo tơlơi dưi, bruă kiăng ngă lĕ: Čih pơkra akŏ bruă, hơmâo hơdră ngă bruă, hơdră pơsir kiăng git gai črâo bruă khut khăt, hmao tlôn, tŭ yua bruă pơgang klin Covid-19. Pơhiăp ƀơi mông jơnum, Khua dêh čar ơi Phạm Minh Chính kiăng mơnuih mă bruă amăng Anom bruă pơphun ngă bruă hlao mơtăm, hơmâo pran jua ngă bruă klă, hrŏm hăng mơnuih ƀon sang djru pơhlôm, pơgang, dưi pơgang klin. Khua dêh čar črâo rơđah, amăng bruă pơgang klin, khŏm ngă bruă djơ̆ hrŏm, tŭ yua; hơdôm ding jum, anom bruă jao wai lăng pơ Gơnong dlông lĕ ƀu dưi ngă brơi bruă mơng tơring čar, plơi pla anun ôh mơ̆, kơnong dưi djru hơdôm tơlơi mơ̆ tơring čar, plơi pla anun ngă ƀu dưi, laih anun pơtrut bruă wai lăng, pel ĕp na nao bruă pơgang klin.

Siu H’Mai: Pơblang