VOV4.Jarai - Lơ 26/7, Lâm Đồng čih pioh hơmâo dong 5 čô mơnuih ƀă kman Covid-19, pơđĭ tui mrô mơnuih ƀă kman amăng tơring čar lĕ 40 čô. Amăng mrô anai, hơmâo 6 čô hơmâo pơjrao suaih laih. Amăng 5 čô mơnuih phrâo ƀă kman, hơmâo 2 čô lĕ mơnuih mơgat rơdêh pơgiăng gơnam mơng ƀon prong HỒ Chí Minh, 2 čô lĕ F1 - bơnai hăng ană mơng sa amăng 2 čô mơgah mơgat rơdêh anai, laih anun 1 čô hơmâo ƀuh lơ̆m pơčrang kman abih bang amăng plơi pla. Bơdjơ̆ nao ƀing phrâo ƀă kman, mơnuih apăn bruă pơgang klin tơring Lâm Đồng hơmâo hyu ĕp kru, hơduah tơña mơnuih dŏ jê̆ giăm, hơmâo ƀuh 66 čô F1, 189 čô F2, laih dong pok pơhai bruă pơgang klin kah hăng pơgăn anih, krăp lăng tơlơi suaih pral hăng hyu ĕp mơnuih dŏ jê̆ hăng ƀing ruă ƀơi 15 anih amuñ hơmâo klin ƀơi tơring glông Đức Trọng hăng Đơn Dương.

Plơi Fi Nôm, să Hiệp Thạnh, tơring glông Đức Trọng (Lâm Đồng) glăk brơi pơčlah mơnuih mơnam tui tơlơi pơčrâo trun 16 mơng Khua dêh čar.

Rơngiao kơ bruă hyu hơduah ĕp bơdjơ̆ nao 5 čô mơnuih phrâo ƀă amăng tơring čar, tơring čar Lâm Đồng glăk ječ ameč hyu ĕp ƀing dŏ jê̆ hăng pô ruă 95575 ƀơi Ninh Thuận. Hlâo kơ anun, pô anai dŏ hăng bruă mă ƀơi Đà Lạt, hơmâo bưp lu mơnuih. Yap truh 12 mông yang hrơi dong lơ 26/7, Lâm Đồng čih pioh hơmâo abih bang 40 čô mơnuih ƀă klin Covid-19. Tơring čar glăk brơi pơčlah 5.643 čô mơnuih. Bruă pơgang klin Covid-19 glăk hơmâo ƀing apăn bruă pơgang klin ngă tañ.

Siu H’Mai: Pơblang