VOV4.Jarai - Lơ 6/10, Jơnum min mơnuih ƀon sang tơring čar Lâm Đồng hơmâo hră git gai hơdôm gơnong bruă, khul grup hăng Jơnum min mơnuih ƀon sang hơdôm boh tơring glông, plơi prong prăp lui bruă tlâ̆o vaccine pơgang Covid-19 kơ lu mơnuih. Jơnum min mơnuih ƀon sang tơring čar Lâm Đồng jao kơ Gơnong bruă ia jrao tơring čar git gai, ngă hrŏm hăng hơdôm gơnong bruă, anom bruă bơdjơ̆ nao hăng Jơnum min mơnuih ƀon sang hơdôm boh tơring glông, plơi prong čih pơkra hơdră ngă bruă, prăk lui dram gơnam, mơnuih mă bruă pok pơhai tlâ̆o vaccine mơng anai truh abih thun 2021.

Lâm Đồng glăk čih pơkra bruă tlâ̆o vaccine pơgang Covid-19 kơ lu mơnuih

Hrŏm hăng anun, sem lăng, jŭ yap mrô, hăng čih anăn abih bang mơnuih hơmâo djru tlâ̆o hlâo tui tơlơi pơkă. Tơring čar phrâo hơmâo mă 200.000 liêu vaccine Vero Cell yua Ding jum ia jrao kah brơi laih anun hơmâo tlâ̆o brơi arăt 1 kơ lu mơnuih ƀơi hơdôm tơring glông, plơi prong. Hrŏm hăng rơbêh 233.000 liêu vaccine hơmâo tlâ̆o mơng hlâo, hăng akŏ bruă kah pơpha brơi dong vaccine pơgang klin Covid-19 amăng hrơi blan pơ anăp, truh abih thun anai, Lâm Đồng amra hơmâo 70% mrô mơnuih mơng 18 thun hơmâo tlâ̆o pơgang.   

Siu H’Mai: Pơblang