VOV4.Jarai - Čơtlăm lơ 2/8, Ping gah tơring čar Lâm Đồng hmâo ba tơbiă laih Tơlơi črâo ba bruă kơtưn pơgang, pơgăn klin Covid-19 ƀơi tơring čar. Amăng anun, rơkâo mơnuih ƀôn sang ƀu tơbiă gah rơngiao hăng hơdư̆ hĭ đuăi nao rai tơdơi 9 mông mlăm truh 5 mông mơguah hrơi tơdơi, rơngiao kơ mơnuih kiăng ječ kah hăng apui ƀong, pơjrao tañ mơnuih ruă kraih.

Ping gah tơring čar Lâm Đồng mă yua tơlơi črâo ba ngă hơdư̆ mơnuih ƀôn sang tơbiă gah rơngiao tơdơi 9 mông mlăm

Tơlơi črâo ba anai pơphun mă yua ngă tui yap mơng lơ 4/8. Hăng jơlan gah lĕ “Pơgang kơjăp, ngă tui tañ” kiăng ngă hơdư̆ klin, huai lar hyu prong, tơlơi črâo ba lăi rơđah, Grŭp apăn bruă Ping gah tơring čar rơkâo hơdôm anom bruă amăng tơring čar khom đing nao prong pran, mông mă bruă, đing nao ngăn rơnoh mơnuih mă bruă pioh pơgang, pơgăn klin. Khut khăt ƀu dô̆ tơguan, ah gơnang, gơgrong mă pô amăng anih anom, plơi pla, mơnuih pô wai lăng, ƀu pioh rơngiă bruă wai lăng klin ngă. Tơhnal ba tơbiă lĕ pơgang, pơgăn klin ba glăi bôh tơhnal, djă pioh, hơđong bruă bơwih ƀong, sĭ mơdrô kiăng hmâo ngăn rơnoh pơgang, pơgăn klin hăng djru mơnuih ƀôn sang./.

Siu H’ Prăk: Pô pơblang