VOV4.Jarai - Mơguah lơ 6/8, tơring čar Lâm Đồng pơsit hơmâo 4 čô mơnuih ƀă klin Covid-19 hơmâo ƀuh ƀơi Kông ti tơčoh sum ao DWS - Kông ti TNHH pơkra hrĕ mrai ƀơi să Trạm Hành, plơi prong Đà Lạt. Hlâo kơ anun, mơguah lơ 5/8, Sang ia jrao plơi prong Đà Lạt nao pơ kông ti anai pơčrang kman hmar kơ ƀing kông ñơn laih anun hơmâo ƀuh 4 čô mơnuih ƀă kman.

Pơčrang kman brơi ană plơi ƀơi să Trạm Hành, plơi prong Đà Lạt

Tơdơi kơ anun, Anom wai  lăng klin duam ruă tơring čar Lâm Đồng mă ia khak, ia dung ba pơčrang hăng PCR ăt brơi ƀuh ƀă kman Covid-19 mơn. Kông ti TNHH pơkra hrĕ mrai Đà Lạt hơmâo rơbêh 200 čô kông ñơn, hrơi pơčrang kman hơmâo rơbêh 100 čô kông ñơn glăk dŏ mă bruă. Tơdơi kơ ƀuh hơmâo mơnuih ƀă klin Covid-19, ƀing apăn bruă hơmâo kah đuăi, laih anun ba giăm 90 čô mơnuih bơdjơ̆ nao pô ƀă kman arăng iâu F1 nao pơčlah ha anih, laih dong hyu ĕp ƀing dŏ jê̆ giăm pơkŏn dong. Bruă hyu ĕp mơnuih dŏ giăm pô ruă, guang dar pơgăn klin hơmâo ling tơhan, ơi ia jrao mơng tơring čar Lâm Đồng ngă ječ ameč mơtăm yơh.

Siu H’Mai: Pơblang