VOV4.Jarai -  Anăp nao tơlơi iâu pơthưr mơng Khua git gai Ping gah, Khua mir sir dêh čar kơ bruă Abih bang mơnuih ƀôn sang gum hrom hơbit, run pran pơgang pơgăn klin Covid-19, gum hrom, djru hơdôm bôh tơring čar, ƀôn prong amăng bruă pơgang, pơgăn klin ruă, mơng blan 7 truh ră anai, tơring čar Lâm Đồng hmâo iâu pơhrui djop ngăn rơnoh pơhrui blơi, djru hmâo giăm truh 29.000 tơn gơnam mă mơng đang hmua, biă ñu lĕ añăm hla rok, hơbơi pơtơi, bôh troh kơ mơnuih ƀôn sang ƀơi hơdôm kual klin ngă.

Amăng anun, lu biă ñu lĕ djru brơi kơ mơnuih ƀôn sang ƀơi ƀôn prong Hồ Chí Minh hăng mrô gơnam truh kơ 16.800 tơn, ƀôn prong Đà Nẵng giăm truh kơ 2.300 tơn, hơdôm bôh tơring čar pơkon kah hăng Đồng Nai, Bình Dương, Khánh Hòa, Bình Thuận, Bà Rịa – Vũng Tàu, Phú Yên, Long An, Tiền Giang... rơbêh kơ 9.600 tơn gơnam mă mơng đang hmua. Tui hăng Gơnong bruă đang hmua hăng pơđĭ kyar tơring čar Lâm Đồng, abih bang mrô gơnam anai hmâo nua giăm truh 188 klai prăk, dưi iâu pơhrui mơng lu ngăn rơnoh gum hơgôp./.

Siu H’ Prăk: Pô pơblang