VOV4.Jarai -  Hăng anih anom giăm hăng plơi prong Đà Lạt, anih hmâo mrô mơnuih ƀă Covid-19 lu hloh mơng tơring čar Lâm Đồng, samơ̆ gơnang kơ ngă tui pran jua gum hrom hơbit amăng bruă pơgang, pơgăn klin, tơring glông Lạc Dương ăt lĕ “kual mơtah” akă hmâo mơnuih ƀă klin Covid-19 hơpă ôh. Kiăng djă pioh dong bôh tơhnal anai, mơnuih ƀôn sang hơdôm bôh plơi pla ƀơi anai glăk pơdŏng hơdôm grŭp wai lăng mă pô kual mơtah, pơpha mơnuih dô̆ gak hrơi mlăm kiăng thâo hơdôm bruă mut tơbiă amăng kual plơi pla.

Hơdôm hrơi rơgao, khă adai pơ-iă ƀudah hơjan, rơbêh kơ pluh čô ding kơna mơng Grŭp wai lăng mă pô kual mơtah mơng thôn 1, să Dă Sar, tơring glông Lạc Dương, tơring čar Lâm Đồng ăt djă pioh mơn bruă mă hăng ngă klă bruă pơgang, pơgăn klin Covid-19 mơng pô. Dong mơng akô̆ jơlan ƀê tông weh nao amăng thôn mơtăm hmâo mơnuih dô̆ gak hrơi mlăm kiăng wai lăng hơdôm bruă mut tơbiă, biă ñu rơdêh hăng mơnuih mơng anih pơkon nao. Ơi Păng Tin Doanh, Khua grŭp wai lăng mă pô brơi thâo, khă bruă mă glêh glar mơn samơ̆ ƀing adơi ayong amăng grŭp ăt pơpha mơn mông, pơpha dô̆ gak, pơhlôm bruă pơgang anih mơtah – kual pơhlôm ƀu hmâo klin Covid-19 kơ plơi pla.

“Lom hmâo mơnuih mơng anih pơkon nao lĕ ta čih rơđah mrô rơdêh, anăn păn, anih anom ñu dô̆. Kơnong kơ bruă hyu tir lĕ dưi ngă tui mơng sui laih. Neh wa ƀơi anai ngă tui klă bruă lăi pơthâo gah ia jrao, ngă tui 5 mơta pơgang klin, anai lĕ tơlơi lăp mơ-ak biă, plai ƀiă ghêl tơnap kơ grŭp pơgang, pơgăn klin Covid-19. Kâo čang rơmang lĕ khom djă pioh hăng pơhư prong hơdră anai kiăng pơhlôm pơgang, pơgăn klin pơhlôm, sa čô mơnuih yua kơ djop mơnuih”.

Hơdôm bôh rơdêh hăng mơnuih mơng anih anom pơkon nao leng kơ dưi hmâo Grŭp wai lăng mă pô čih rơđah hơdôm tơlơi či kiăng

Să Dă Sar, tơring glông Lạc Dương giăm hăng plơi prong Đà Lạt, laih anun dŏng ƀơi giăm jơlan mrô 27C anun rim hrơi hmâo lu mơnuih mut tơbiă amăng să. Ơi Phạm Ngọc Giáo, ƀơi phường mrô 9, plơi prong Đà Lạt, pô juăt găn nao rai ƀơi anih gak wai lăng klin Covid-19 anai brơi thâo, yua hmâo đang hmua amăng kual anun rim hrơi ñu hăng lu mơnuih mơng anih pơkon nao pơ̆ anun. Rim wot nao rai leng kơ lăi pơthâo gah ia jrao tum djop, khă hmâo rơngiă mông samơ̆ anai lĕ rơlơi kiăng biă. Ơi Giáo brơi thâo:

“Tui anun klă biă, yua kơ kâo yua kơ djop mơnuih ƀu djơ̆ pioh djop mơnuih yua kơ pô ôh. Hăng drơi pô kâo anun lĕ sa tơlơi pơčeh klă amăng bơyan klin ngă anai yua kơ ñu djơ̆. Klin ră anai ñu ƀu ƀuh rŭp, ia mơtah kơñĭ ôh, hlơi thâo dô̆ pơ̆ hơpă anun pơgang hlôm hlâo lĕ klă hloh”.

Wot hăng mơnuih ƀôn sang ƀơi anai nao rai ăt lăi pơthâo djop tum mơn

Ƀu djơ̆ kơnong kơ să Dă Sar, hơdôm bôn plơi pla, grŭp mơnuih ƀôn sang mơng hơdôm bôh să, tơring kual ƀơi tơring glông Lạc Dương leng kơ pơdŏng grŭp wai lăng mă pô kual mơtah, kual ƀu hmâo klin Covid-19 hăng dưi hmâo mơnuih ƀôn sang dŏng yua dong. Tui hăng amai Kơ Să Ka Liêm, Khua git gai Khul hlăk ai să Dă Nhim, hlâo adih neh wa amăng plơi akă hmâo tơlơi pơmin hăng gơgrong prong ôh amăng bruă ngă tui hơdôm bruă pơgang, pơgăn klin Covid-19. Mơng hrơi pơdŏng grŭp wai pơgang mă pô kual mơtah, hơdôm mơnuih amăng grŭp pơtrut kơtang hyu lăi pơhing anun ră anai hlơi hlơi leng kơ ngă tui klă bruă gôm adung mơbah, lăi pơthâo pô lom tơbiă mơng plơi pla.

“Pơdŏng grŭp gak lĕ hrơi blung a tơnap tap biă samơ̆ tơdơi kơ lăi pơhing mơnuih ƀôn sang pơđĭ tui tơlơi pơmin pơgang, pơgăn klin ƀu dô̆ tơnap dong tah. Ră anai mơnuih ƀôn sang, yap wot ƀing hlăk ai hmâo ngă tui klă biă bruă pơgang, pơgăn klin. Pơhlôm na nao djă bơnal gôm adung mơbah hăng hơdôm bruă pơgang 5 mơta lom tơbiă gah rơngiao”.

Hơdôm anih gak mơng Grŭp wai lăng mă pô kual ƀu hmâo ƀă klin ƀơi tơring glông Lạc Dương djru yôm phăn amăng bruă pơgang pơgăn klin Covid-19 mơng tơring glông

Lạc Dương lĕ tơring glông hmâo lu mơnuih djuai ania K’ho dô̆ hơdip mơta hloh. Khă giăm hăng plơi prong Đà Lạt, anih hmâo mrô mơnuih ƀă Covid-19 lu hloh amăng tơring čar samơ̆ Lạc Dương ră anai ăt akă hmâo hlơi ƀă kơman klin Covid-19. Kiăng hmâo bôh tơhnal anai, rơngiao kơ tơlơi gir run hrom mơng khul apăn bruă hăng gong gai plơi pla, hơdôm khul wai lăng mă pô kual mơtah ƀơi hơdôm bôh plơi jing yôm phăn biă, djru lu biă kơ bruă pơgang, pơgăn klin Covid-19 mơng Lạc Dương lăi ha jăn hăng Lâm Đồng lăi hrom./.

            Quang Sáng: Pô čih – Siu H’ Prăk: Pô pơblang