VOV4.Jarai - Mah bruă lăi pơthâo hlâo, pơgang hlâo hăng hơjan kơthel lêng hơmâo Lâm Đồng ngă kơjăp kơtang, samơ̆ tơlơi răm rai yua hơjan kơthel ngă ƀơi tơring čar anai ăt prong mơn. mơng akŏ bơyan hơjan truh mông anai, tơring čar Lâm Đồng hơmâo 20 wơ̆t hơjan prong, hơmâo hơjan pler, 12 wơ̆t angin kơthel, 2 wơ̆t lŏn tơhlŏm hăng 5 wơ̆t tar tlă ngă 2 čô mơnuih djai hăng 2 čô mơnuih ruă. Tơlơi truh lŏn adai ngă ăt ngă rơbêh 1.300 ha phun pla răm rai hăng rơngiă soh sel, 1,2 hectar dơnao rông akan hơdang ia kor đuăi abih, 379 boh sang dŏ hăng 20 hectar sang mơnil pla anăm pơtăm hăng 3 anom bruă kơnuk kơna răm rai, prăk rơngiă him lăng truh 53 klai prăk. Tui hăng ơi Nguyễn Hà Lộc, Khua anom bruă dơnao kŏng ia, ding kơna Anom git gai pơgang tơlơi truh lŏn adai ngă hăng hyu ĕp mơnuih bưp tơlơi truh tơring čar Lâm Đồng lăi, mah hơmâo anih pơkă ia hơjan mă bruă klă biă, hrŏ hăng tơlơi apăn bruă pơgang tơlơi truh mơng ƀing khua, mơnuih mă bruă hăng mơnuih ƀon sang, samơ̆ ayuh hyiăng lŏn adai pơplih phara ăt hơmâo tơlơi truh prong mơn. Kiăng plai ƀiă tơlơi răm rai, rơngiao kơ pơkra măi mok pơkă hlâo ayuh hyiăng, lăi pơthâo hlâo tơlơi truh, tơring čar glăk pơƀut pơkra hơdră pơsir rơnuk rơnua dơnao kŏng ia, bơnư̆ kŏng ia.

Siu H’Mai: Pơblang