VOV4.Jarai - Lơ 7/6, Gơnong bruă ia jrao tơring čar Lâm Đồng brơi thâo, anom apăn bruă phrâo ƀuh sa čô mơnuih nao dŏ pơčlah pơ ala kơ pô glăi mơng anih hơmâo klin. Tơdơi kơ ƀuh mơnuih plih brơi pô nao dŏ pơčlah pơgang klin, ƀing apăn bruă ječ ameč nao pơsit anăn hăng anih dŏ mơng ơi Đ.N.D, laih dong ječ ameč ba pô anai nao dŏ pơčlah tui tơlơi pơtrun. Hrŏm hăng anun, pơhrua nao tơlơi pơsit brơi pơčlah hlao hăng pô plih brơi anun lĕ ơi T.Đ.D. Tui gơnong bruă ia jrao Lâm Đồng, pô anai ngă soh tơlơi pơtrun pơgang klin Covid-19 laih anun amra bơtơhmal lăp djơ̆ tơdơi kơ abih 21 hrơi dŏ pơčlah. Yap truh 6 mông lơ 7/6, tơring čar glăk brơi pơčlah 2.490 čô mơnuih. Hrŏm hăng anun, Lâm Đồng hơmâo thim 215 čơđeh drah, ia khak hơmâo pơčrang huăi hơmâo Sars-CoV-2.

Lâm Đồng ngă klă bruă pơhaih pơ sang ia jrao lơ̆m rai mơng anih hơmâo klin

Siu H’Mai: Pơblang