VOV4.Jarai - Tlam lơ 5/7, tơring čar Lâm Đồng hơmâo dong 1 čô mơnuih ƀă klin Sars-Cov2. Anai lĕ mơnuih ƀă klin bơdjơ̆ nao mơnuih ƀă blung a amăng tơring čar. Mơnuih ƀă klin phrâo anai lĕ ơi T.X.C (56 thun), lĕ sang jê̆ giăm hăng đah kơmơi ƀă klin mrô 17.951 (ƀơi plơi Phú Hoà, să Mỹ Đức, tơring glông Dă Teh, Lâm Đồng), lĕ mơnuih glăi mơng Hóc Môn (Hồ Chí Minh). Ơi C. lĕ sa amăng ƀing mơnuih F1 yua anun, hlâo anun arăng ba nao pơčlah, kiăo tui lăng hăng mă ia adung pơčrang lăng huăi ƀă klin.

Gơnong bruă tơring čar Lâm Đồng ječ ameč kiăo tui ĕp, pơčrang lăng amăng mơnuih ƀon sang

Tơdơi kơ ƀuh pô anai ƀă klin Covid-19, gơnong bruă ia jrao tơring čar Lâm Đồng hơmâo ba ơi T.X.C mơng anih pơčlah nao pơ anih pơjrao ƀơi tơring glông Dă Teh. Yua anun, truh ră anai, tơring čar Lâm Đồng hơmâo 6 čô mơnuih ƀă klin Covid-19. Ră anai bruă kiăo tui ĕp mơnuih jê̆ giăm hăng ƀing ƀă klin hơmâo tơring čar Lâm Đồng pơphun jêc ameč.

Siu Đoan: Pơblang