VOV4.Jarai -  Mơguah lơ 20/10, ƀơi plơi prong Đà Lạt, Grŭp khua pơ ala Khul khua pơ ala mơnuih ƀôn sang tơring čar Lâm Đồng hmâo nao pơhmư̆ pok phun jơnum lok 2, Khua pơ ala mơnuih ƀôn sang dêh čar ta tal 15 hăng hơdră lăng nao rai mơng ataih. Hrom hăng hơdôm tơlơi hrom mơng đơ đam dêh čar, ƀing khua pơ ala mơng tơring čar Lâm Đồng hmâo prăp lui laih kiăng lăi pơthâo hơdôm tơlơi gum pơhiăp, rơkâo đĭ mơng mơnuih ƀôn sang amăng tơring čar kơ hơdôm tơlơi phrâo hmâo, akă gal kiăng hmâo Khua pơ ala mơnuih ƀôn sang, Kơnuk kơna đing nao, bơkơtuai jơlan gah kiăng hmao pơkra glăi hăng hơkrŭ pơsir pơ̆ anăp anai.

Ơi Nguyễn Tạo, Kơ-iăng Khua Grŭp khua pơ ala mơnuih ƀôn sang tơring čar Lâm Đồng brơi thâo, klin ruă Covid-19 hmâo bơdjơ̆ nao prong truh 2 gơnong bruă bơwih ƀong ba jơlan hlâo mơng tơring čar lĕ bruă đang hmua hăng tuai čuă ngui. Amăng anun, tơlơi hơkrŭ bruă bơwih ƀong huă, hơđong bruă ba hyu sĭ kơ gơnam mă mơnuih đang hmua, biă ñu hơdôm gơnam añăm pơtăm – bơnga glăk dưi hmâo gơnong bruă đang hmua tơring čar amăng ƀrư̆ hơkrŭ glăi, pơphun bruă ngă đang hmua, dăp hơdră gơnam tam ngă hiưm hơpă djơ̆, djop gơnam kiăng yua amăng tơlơi hơđong phrâo./.

Siu H’ Prăk: Pô pơblang