VOV4.Jarai - Lơ 8/11, Lâm Đồng čih hmâo dong lu mơnuih ƀă Covid-19 raih daih ƀơi 7 bôh tơring glông, plơi prong amăng tơring čar. Gong gai pơdơi jăng jai lu bruă mă bơwih buang kiăng pơgang pơgăn klin. Amăng mrô 20 čô mơnuih ƀă Covid-19 phrâo anai ƀơi Lâm Đồng, lu ñu hmâo bôh than mơng ƀôn prong Hồ Chí Minh, Bình Dương hăng Long An. Amăng anun, hmâo 8 čô mơnuih čih pioh gah rơngiao plơi pla, sa čô lĕ đah kơmơi mă bruă djru djă rơdêh, ba hyu gơnam tam lu anih amăng tơring čar. Ră anai khul gơgrong bruă anai mơng tơring čar glăk hyu huĕt ĕp, lăng tui hơdôm mơnuih bơdjơ̆ nao mơnuih ƀă klin phrâo anai.

Lâm Đồng kơtưn ruah tơbiă, hyu huĕt ĕp mơnuih bơdjơ̆ nao ƀut mơnuih lar tưp tơlơi ruă amăng plơi pla.

Hrom hăng anun, Lâm Đồng ăt đing nao huĕt ĕp mơn hơdôm mơnuih bơdjơ̆ nao 52 anih lar tưp pơkon, biă ñu ƀơi Đà Lạt, Đức Trọng, Di Linh hăng plơi prong Bảo Lộc. Yap amăng 3 rơwang hrơi tơjuh rơgao, Lâm Đồng hmâo dong 305 čô mơnuih ƀă Covid-19, đĭ tui mrô đơ đam tơring čar truh kơ 708 čô. Ƀơi anăp tơlơi ngă glêh tơnap mơng klin ruă. Yap truh ră anai, Lâm Đồng čih hmâo 708 čô mơnuih ƀă klin Covid-19, amăng anun hmâo 3 čô mơnuih djai hăng 454 čô dưi pơjrao suaih./.

Siu H’ Prăk: Pô pơblang