VOV4.Jarai - Mơnuih mơgăt rơdêh  ƀă klin Covid-19 lĕ ayong N.M.T (33 thun, dŏ ƀơi ƀut plơi 5, să Đinh Trang Thượng, tơring glông Di Linh), lĕ mơnuih ƀă klin mrô 41.056 hăng lĕ mơnuih ƀă klin Covid-19 tal 15 amăng tơring čar Lâm Đồng. Tui hăng pel ĕp, ayong T. mă bruă ƀơi kông ti Thiên Anh, kuận 12, ƀôn prong Hồ Chí Minh. Giăm 2 mông lơ 12/7, ayong T. đĭ rơdêh thut glăi pơ Di Linh. Lơ̆m găn nao anih wai pơgang klin ƀơi jơlan kơčep Chuối (tơring glông Dă Huoai, Lâm Đồng), ayong T. phaih gah ia jrao samơ̆ ƀu lăi tơpă, ñu lăi glăi mơng tơring kual Madanguoi (Dă Huoai) yua anun arăng brơi mut nao. Lơ 15/7, ayong T. đĭ rơdêh thut mơng sang nao pơ Sang ia jrao phường B’Lao (Bảo Lộc) kiăng kơ pơčrang lăng tañ, dua wŏt pơčrang lăng lêng kơ ƀă klin.

Lâm Đồng đing nao kiăo tui ĕp, pơčlah hăng pơčrang lăng ƀing mơnuih jê̆ giăm

Tơdơi anun ayong T. pơčrang lăng hăng RT-PCR ƀơi sang ia jrao prong mrô II Lâm Đồng ăt ƀă virus Sars-Cov2. Tui ơi Nguyễn Đức Thuận, Khua gơnong bruă ia jrao Lâm Đồng, gơnong bruă glăk ječ ameč gum hrŏm hăng djop anom bruă kiăo tui ĕp 5 čô mơnuih F1 hăng 9 čô mơnuih F2 jê̆ giăm hăng mơnuih ƀă klin. Abih bang ƀing pô anai pơčrang lăng lêng huăi ƀă klin. Ră anai, kiăo tui ĕp, pơčlah hăng ƀing bơdjơ̆ nao glăk hơmâo tơring čar Lâm Đồng pơphun ječ.

Siu Đoan: Pơblang