VOV4.Jarai - Čơtlăm lơ 6/8, Grŭp Črâo bruă pơgang, pơgăn klin Covid-19 tơring čar Lâm Đồng hmâo tơlơi pơsit ječ ngă tui dô̆ čơlah mơnuih mơnam tui Tơlơi črâo ba mrô 16 mơng Khua dêh čar ƀơi 2 bôh să amăng plơi prong Đà Lạt. Kiăo tui anun, yap mơng 7 mông mơmot lơ 6/8, 2 bôh să Xuân Trường hăng Trạm Hành mơng plơi prong Đà Lạt amra pơphun ngă tui dô̆ čơlah mơnuih mơnam tui Tơlơi črâo ba 16 truh kơ hmâo tơlơi lăi pơthâo phrâo.

Bruă pel ĕp, hyu huĕt ĕp dưi hmâo anom apăn bruă tơring čar Lâm Đồng pok pơhai klă

Tơlơi pơsit dô̆ čơlah mơnuih mơnam ƀơi 2 bôh să anai ba tơbiă amăng hơdôm hrơi klin Covid-19 ngă glêh tơnap. Grŭp črâo bruă pơgang, pơgăn klin Covid-19 tơring čar Lâm Đồng jao kơ Khua Jơnum min mơnuih ƀôn sang plơi prong Đà Lạt pơphun pok pơhai ngă tui. Bơdjơ̆ nao anih klin ngă phrâo, tơring čar Lâm Đồng hmâo lăi pơhing hyu ječ laih kiăng ĕp mơnuih ƀuh ƀô̆ ƀơi hơdôm anih anom  amra hmâo klin ngă. Amăng anun, rơngiao kơ hơdôm anih anom gah 2 bôh să Trạm Hành hăng Xuân Trường, dô̆ hmâo sa dua anih anom pơkon ƀơi hơdôm phường 1, 2, 4, 9 hăng 10 ƀơi plơi prong Đà Lạt. Ră anai bruă hyu huĕt ĕp, guang dar kual kiăng pơgăn klin, bĕ lar hyu glăk dưi hmâo hơdôm bôh anom pok pơhai klă./.

Siu H’ Prăk: Pô pơblang