VOV4.Jarai - Ngă tui kơčăo bruă pla sa klai phun kyâo mơtah rơwang thun 2021-2025 hơmâo Khua dêh čar kĭ hră, tơring čar Lâm Đồng čih pơkra bruă mă hăng glăk pla 50 klăk phun kyâo mơtah ƀơi tơring čar. Tơring čar Lâm Đồng ră anai hơmâo giăm 454.900 ha glai rưng hơđăp hăng 83.850 ha glai rưng pla mă, mrô kyâo pơging amăng glai hơmâo 55%, aset ƀiă 7% pơhmu hăng 10 thun hlâo.

Đang pơdjuai anah phun pla mơng Anom bruă wai lăng glai rưng Lâm Viên brơi anah phun kyâo pla ƀơi hơdôm boh să, phường ƀơi plơi prong Đà Lạt.

Kiăng ngă kyâo hơ-um dưi pơging lu amăng glai, dưi hơdip amăng tơlơi pơplih ayuh hyiăng hăng pơhlôm tơlơi hơdip amăng glai rưng, amăng thun 2021, tơring čar Lâm Đồng pla dong 490 ha glai rưng ƀơi lŏn arăng lui soh, lŏn arăng mă glăi yua sua mă ča čot. Hrŏm hăng anun, Lâm Đồng ăt pơtrut mơn bruă pla 50 klăk phun kyâo mơtah tui kơčăo bruă pla sa klai phun kyâo mơtah rơwang thun 2021-2025 hơmâo Khua dêh čar pơsit brơi. Yap truh mông anai, hơmâo laih 4 klăk 840 rơbâo phun kyâo mơtah djŏp djuai hơmâo pla ƀơi hơdôm boh tơring glông, plơi prong amăng tơring čar.

Siu H’Mai: Pơblang