VOV4.Jarai - Hmư̆ tui tơlơi git gai mơng Khua dêh čar, boh tơhnal črâo ba mơng djop ding jum, gơnong bruă, tơdơi kơ pơđut tal pơphun Jơlan hơdră “Sóng và máy tính cho em”, lơ 12/9, Khua Jơnum min mơnuih ƀon sang tơring čar Lâm Đồng Trần Văn Hiệp hơmâo git gai, črâo ba hơdôm gơnong bruă, anom bruă gum hrŏm prap lui akŏ bruă tong ten hlâo kơ pok pơhai. Tơring čar amra akŏ pơjing Grup pơtrut pơsur kiăng kơ iâu pơthưr gum pơgôp mơng gong gai ƀon lan, anom bơwih ƀong sĭ mơdrô, khul grup, mơnuih ƀon sang amăng tơring čar gum tơngan hrŏm djru prăk kak ƀudah djru măi komputơr, blung hlâo lĕ ƀơi hơdôm ƀon lan bưp tơnap tap, anih aka ƀu hơmâo glông ineternet, anih hơmâo lu čođai sang hră tơnap tap, rin rơpa. Gơnong bruă pôr pơhing hơmâo gum hrŏm hăng Gơnong bruă pơtô hrăm pel ĕp glăi hơdôm kual ataih, asuek, hơdôm sang anŏ ƀun rin, giăm ƀun rin kiăng kơ čih anăn ƀing čơđai aka ƀu hơmâo măi komputơr, măi mok pioh hrăm lăng nao rai mơng ataih.

Siu Đoan: Pơblang