VOV4.Jarai - Mơguah tom brơi (8/12), jơnum lok 4, Khul pơ ala mơnuih ƀôn sang tơring čar Lâm Đồng tal 10 rơwang bruă 2021-2026 hmâo pơphun laih. Amăng mông tơña hăng lăi glăi tơlơi tơña, hơdôm tơlơi bơdjơ̆ nao hơdôm tơlơi akă dưi ngă, akă ngă amăng bruă wai lăng kơnuk kơna gah dlai klô, lŏn drŏn, hơđong pơdŏng, kông ngăn lŏn mơnai dlai klô... khua pơ ala Khul pơ ala mơnuih ƀôn sang tơring čar Lâm Đồng hmâo đing nao truh bruă pơpha glông lŏn, sĭ lŏn hăng pơjing hơdôm rơwang bruă anih dô̆ mơnuih ƀôn sang “ƀu hmâo sit” hmâo laih ƀơi tơring glông Bảo Lâm hăng plơi prong Bảo Lộc.

Tơlơi lăp lăi, tơlơi anai hmâo sui laih, samơ̆ truh ră anai ăt akă dưi hmâo tơring čar pơsir pơđut mơn. Pơblang amăng mông tơña, ơi Trần Văn Hiệp, Khua Jơnum min mơnuih ƀôn sang tơring čar Lâm Đồng pơsit, tơring čar hmâo mă yua lu laih hră pơ-ar črâo ba hơdôm anom bruă bơdjơ̆ nao pơphun pel ĕp, pơsir samơ̆ tơlơi anai ăt akă dưi pơplih mơn. Ƀu djơ̆ tui anun ôh, ră anai bruă pơpha lŏn, kah lŏn, sĭ lŏn tui hơdră hơdôm rơwang bruă "ƀu hmâo sit"dô̆ lar hyu prong mơn pơ̆ sa dua anih anom pơkon./.  

Siu H’ Prăk: Pơblang