VOV4.Jarai - Kiăng pơhlôm bruă pơgang pơgăn Covid-19 amăng hrơi plĕ hră ruah khua, Gơnong bruă ia jrao tơring čar Lâm Đồng hmâo laih hră pơ-ar črâo ba hơdôm bôh Sang ia jrao, anih anom pel ĕp, pơjrao tơlơi duam ruă amăng tơring čar pơpha khul mơnuih, amra pơsir, bŏng glăi hăng tơlơi amra truh.

Mơnuih apăn bruă ia jrao să, phường, tơring kual glăk prăp lui bơnal gôm adung mơbah, ia pơdjai kơman ƀơi kual plĕ hră

Gơnong bruă ia jrao tơring čar Lâm Đồng hmâo pơđar laih hơdôm bôh sang ia jrao gah tơring čar; Anom ia jrao hơdôm bôh tơring glông, plơi prong hăng Sang ia jrao prong Hoàn Mỹ Đà Lạt, rim anom pơdŏng sa grŭp mơnuih hyu gum djru anun lĕ ƀing ơi nai ia jrao hăng pô mơnuih mơgăt rơdêh, hmâo djop mrô jrao kiăng yua, măi mok rơdêh pơgiăng, kiăng djru hmao tlôn kơ tơring glông, plơi prong hăng să, phường, tơring kual. Hrom hăng anun, lăi pơthâo jơlan kiăng ječ mơng anom kơ hơdôm bôh să, phường, tơring kual hăng hơdôm Grŭp ruah khua amăng tơring čar kiăng hmao tlôn tŭ mă tơlơi pơhing lom kiăng. Rơngiao kơ anun, hơdôm gơnong bruă ia jrao amăng tơring čar khom pơphun abih bang hơdôm grŭp pơsir tañ, prăp ngă tui hơdôm bruă pơgang pơgăn Covid-19 lom hmâo tơlơi truh. Gơnong bruă ăt hmâo iâu pơhrui mơn rơbêh kơ 1.100 čô mơnuih apăn bruă ia jrao dô̆ gak ƀơi abih bang hơdôm anih anom ruah khua kiăng gơgrong hlâo bruă pơgang pơgăn klin./.

Siu H’ Prăk: Pô pơblang