VOV4.Jarai - Ngă tui “juăt pơhlôm, pơplih tañ, wai lăng ba glăi bôh tơhnal klin Covid-19” tui hăng Tơlơi pơtrun pơsit 128 mơng Kơnuk kơna, tơring čar Lâm Đồng glăk pơtrut kơtang bruă tlâ̆o vaccine kơ mơnuih ƀôn sang. Truh mông anai, tơring čar Lâm Đồng hmâo pha brơi laih rơbêh kơ 1.500.000 liều vaccine pơgang, pơgăn klin Covid-19. Tơring čar hmâo ngă giong laih 20 tal tlâ̆o pơgang hăng glăk ngă tui bruă tlâ̆o pơgang tal 21.

Hăng mrô vaccine anai, Lâm Đồng hmâo mrô lu mơnuih dưi tlâ̆o pơgang ară tal sa lĕ 96,2% hăng ară tal 2 lĕ 44% kơ hơdôm mơnuih 18 hăng lu hloh kơ 18 thun. Tui hăng Gơnong bruă ia jrao tơring čar Lâm Đồng, rơngiao kơ mơnuih rơbêh kơ 18 thun, tơring čar ăt glăk ba tơbiă mơn kơčăo bruă tlâ̆o vaccine pơgang kơ čơđai mơng 12 truh 17 thun. Hrom hăng pơtrut kơtang tlâ̆o vaccine, hơdôm jơlan gah pơkon amăng ngă tui “juăt pơhlôm, pơplih tañ, wai lăng ba glăi bôh tơhnal klin Covid-19” ăt dưi hmâo tơring čar đing nao hăng pơtrut kơtang mơn bruă ngă tui./.

Siu H’ Prăk: Pô pơblang