VOV4.Jarai-Yap truh 9 mông mơguah lơ 23/5, Lâm Đồng hơmâo rơbêh 281 rơbâo čô mơnuih plĕ hră ruah khua, giăm 30% mrô mơnuih ƀôn sang plĕ hră amăng tơring čar. Giong jơnum pok ngă bruă ruah khua, abih bang 1.110 kual plĕ hră amăng tơring čar Lâm Đồng pơphun plĕ hră yơh, ruah khua pơ ala mơnuih ƀôn sang dêh čar tal XV hăng ƀing pơ ala mơnuih ƀôn sang djop gưl, rơwang bruă thun 2021-2026.

Tơdơi kơ 2 mông hơmâo rơbêh 281 rơbâo čô mơnuih plĕ hră, giăm 30% mrô mơnuih hơmâo anăn plĕ hră amăng tơring čar ngă giong laih bruă ngă mơ̆ng pô. Ƀơi hơdôm anih plĕ hră ruah khua, bruă ruah khua pơphun rơnuk rơnua, tơpă ară, abih bang mơnuih plĕ hră ruah khua lêng kơ ngă djơ̆ 5 mơta tơlơi pơtrun mơ̆ng ding jum ia jrao, brơi pơhlôm pơgang klin Covid 19.

Ƀơi anih plĕ hră mrô 5, tơring kual Lạc Dương, tơring glông Lạc Dương, Lâm Đồng, mơnuih  ƀôn sang djuai ania K’ho pơ anai ăt hur har nao plĕ hră ruah khua tơdơi kơ pok mông jơnum pơphun ruah khua.

Mơnuih nao plĕ hră Liêng Hot Ha Tuyên, 60 thun, dŏ pơ ƀôn Đăng Ya Dêt B, tơring kual Lạc Dương hơmâo ngă giong bruă ruah khua, ñu mơak lăi:

“Ĕp lăng anăn laih anun khom sem tong ten pioh ruah pô hlơi. Đăo kơnang kơ pô hlơi lĕ ta plĕ ruah pô anun. Kiăng ruah mơnuih rơgơi, hơmâo pran jua klă djru kơ ană plơi pla, khom ngă bruă yua kơ ping gah, yua kơ lŏn ia, yua kơ mơnuih ƀôn sang! Čang rơmang mơ̆ng ta lĕ tui anun yơh”.

  Nay Jek: Pơblang