VOV4.Jarai-Tơdơi kơ lu wơ̆t laih pơhrơ̆i hĭ, truh ră anai, bruă ruh hĭ sang mơnil gôm ngă hmua pla añăm pơtam ča čot amăng glai tơring čar Lâm Đồng aka ƀu ngă giong ôh. Tui hăng bruă sem lăng, lu anom bruă kơnuk kơna Lâm Đồng, đơ đam tơring čar hơmâo 227 ha hmua gôm hăng mơnil, ngă sang dăng hơnôl gôm ča čot amăng glai klô. Amăng anun, lu biă mă ñu ƀơi plơi prong Đà Lạt giăm 185 ha, tŏ tui dơ̆ng tơring glông Lạc Dương rơbêh 21 ha, Đơn Dương 16 ha, dŏ glăi raih daih pơ Đức Trọng, Dam Rông hăng Di Linh.

 Mah hlâo kơ anun, Jơnum min mơnuih ƀôn sang Lâm Đồng hơmâo kĭ hră pơtrun git gai djop tơring glông, plơi prong hăng hơdôm anom bruă hơmâo tơlơi dưi brơi nao ruh hĭ sang mơnil gôm hmua ča čot anun, khom giong hlâo kơ lơ 30/9/2021, samơ̆ truh ră anai đơ đam ruh giong kiah hơmâo 10% đôč. Tui hăng Gơnong bruă Ngă hmua hăng Pơđĭ kyar plơi pla Lâm Đồng, yua kơ kaih anun lĕ hră pơar pơtrun pioh pơgô̆ brơi ruh hĭ tơnap đơi, mơnuih ƀôn sang hlăk dŏ pla gơnam amăng đang anun, yua anun yơh khom tơguan sui hrơi blan ƀiă, pơđur gơñu.

Nay Jek: Pơblang