VOV4.Jarai - Mơguah lơ 1/7, Khul pơ ala mơnuih ƀôn sang tơring čar Lâm Đồng tal 10, rơwang bruă 2021-2026 hmâo pơphun tal jơnum lok sa kiăng ruah khua mua apăn bruă hăng hluai tui sa dua hră pơ-ar lăi pơthâo yôm phăn.

Tal jơnum lok sa Khul pơ ala mơnuih ƀôn sang tơring čar Lâm Đồng tal 10, rơwang bruă 2021-2026

Amăng tal jơnum, Jơnum min ruah khua tơring čar Lâm Đồng hmâo lăi pơthâo bôh tơhnal ruah khua, pơsit kơnuih hăng jao hră tŭ yap kơ 66 čô khua pơ ala Khul pơ ala mơnuih ƀôn sang tơring čar tal 10, rơwang bruă 2021-2026. Ƀing khua pơ ala ăt pơphun mơn bruă plĕ hră ruah khua apăn bruă phun mơng Khul pơ ala mơnuih ƀôn sang tơring čar hăng Jơnum min mơnuih ƀôn sang tơring čar, ruah Khua Grŭp, Kơ-iăng Khua Grŭp gơgrong hơdôm grŭp mă bruă pơkă phiăn, bơwih ƀong ngăn drăp, bôh thâo mơnuih mơnam hăng grŭp djuai ania, Khul mơnuih ƀôn sang hăng hơdôm ding kơna Jơnum min mơnuih ƀôn sang tơring čar.

Ơi Trần Đức Quận, Ding kơna Ping gah dêh čar, Khua git gai Ping gah tơring čar Lâm Đồng ruah ngă Khua Khul pơ ala mơnuih ƀôn sang tơring čar tal 10

Ơi Trần Đức Quận, Ding kơna Ping gah dêh čar, Khua git gai Ping gah tơring čar, Khua Khul pơ ala mơnuih ƀôn sang tơring čar tal 9 tô̆ tui bruă dưi ruah ngă Khua Khul pơ ala mơnuih ƀôn sang tơring čar Lâm Đồng tal 10; ơi Trần Văn Hiệp, Kơ-iăng Khua git gai Ping gah tơring čar, Khua Jơnum min mơnuih ƀôn sang tơring čar tal 9, dưi ruah ngă Khua Khul Jơnum min mơnuih ƀôn sang tơring čar tal 10, rơwang bruă 2021-2026. Tal jơnum dô̆ pioh mông bơkơtuai, pơsit hăng lăng glăi hơdôm tơlơi pơtrun pơsit kơ Kơčăo bruă pơphun hơdôm tal jơnum tui tơđar thun 2021 mơng Khul pơ ala mơnuih ƀôn sang tơring čar tal 10, Tơlơi pơtrun pơsit pel ĕp jơlan gah pơpha kơčăo bruă tuh pơplai bruă hrom găp ƀrô mơng thun 2021-2025.

Siu H’ Prăk: Pô pơblang