VOV4.Jarai - Mơguah lơ 7/7, giăm hmâo 14.000 čô čơđai sang hră tơring čar Lâm Đồng hmâo ngă giong laih tơlơi pơplông blung a tal pơplông mă ƀăng gưl 3. Bôh tơhnal tơlơi pơplông blung a ƀơi Lâm Đồng hmâo pơphun pơhlôm, tơpă hăng djơ̆ tơlơi pơkă, ƀu hmâo hlơi ngă soh phiăn pơplông hăng ƀu hmâo tơlơi truh hơpă ôh.

Kiăng pơhlôm tal pơplông gêh gal, rơngiao kơ bruă rơnuk rơnua hơđong, pơhlôm ƀơi jơlan nao rai, tơring čar Lâm Đồng dô̆ đing nao kơtưn bruă pơgang pơgăn klin Covid-19 dong. Abih bang 39 bôh anih pơplông amăng tơring čar leng kơ dưi pơdjai kơman, pơpha dưm ia hơdjă yua, ia čơƀu, jrao pơdjai kơman, bơnal gôm adung mơbah hăng pơkă lăng pơ-iă drơi jăn kiăng bơwih brơi kơ čơđai sang hră hăng mơnuih lăng čơđai pơplông. Hrom hăng anun, jơlan hơdră djru pran bơyan pơplông ăt dưi hmâo khul hlăi ai, tơdăm dra amăng tơring čar kơtưn ngă tui mơn./.

Siu H’ Prăk: Pô pơblang