VOV4.Jarai - Jơnum min mơnuih ƀon sang tơring čar Lâm Đồng phrâo hơmâo hră pơ-ar tŭ yap tơlơi pơtrun pơplih pơkra, pok prong jơlan kơčep Prenn, ară jơlan mut nao plơi prong Đà Lạt kiăng kơ djơ̆ hăng tơlơi gal nao rai, pơsir hĭ bruă rơdêh tơnap nao rai amăng hơdôm mông rơdêh pơgiăng hyu tuai lu.

Jơlan kơčep Prenn Đà Lạt amra pơkra ming, pok prong đĭ 4 ară glông jơlan

Akŏ bruă pơkra ming, pok prong jơlan kơčep Prenn glông 7,4 km, akŏ pơtô hăng jơlan rơdêh đuăi hmar Liên Khương- Prenn, ară rơnuč pơtô hăng jơlan kơčep Prenn kơplah wah jơlan lơ 3 blan 4 (phường 3, plơi prong Đà Lạt), hăng rơnoh prăk tuh pơ alin 514 klai prăk. Jơlan anai prong 4 bơnah rơdêh dưi đuăi nao rai tui hơnong pơkă jơlan gưl 3 ƀơi kual kriang čư̆, rơdêh dưi đuăi 60 km/mông, jơlan đơ đam prong 15 met hăng tuh kơsu prong 14 met. Jơlan anai glăk pơkra 1 boh tơdrông rơgao hĭ jơlan wĕ wŏ glông 120 m, hơmâo wŏt hơdôm anih dŏ ngui lăng glai čư̆, hơmâo 2 ară jơlan dŏ hơđăp lơ̆m rơdêh răm.

Siu Đoan: Pơblang