VOV4.Jarai - Ding jum pơtô pơhrăm dêh čar ta hmâo mă yua laih tơlơi pơtô pơhrăm lăng nao rai mơng ataih djơ̆ hăng rơnoh klin ngă, amăng anun ƀơi hơdôm kual hmâo klin ngă rơnoh 1, 2 (anun lĕ kual mơtah hăng kơñĭ) lĕ dưi pơphun bruă pơtô pơhrăm ƀơi sang hră. Khă hnun hai, lu tơlơi gum pơhiăp lăi lĕ, kiăng pơhlôm klă kơ čơđai sang hră amăng mông ngă juăt pơhlôm, thâo pơplih tañ, wai lăng ba glăi bôh tơhnal klin Covid-19 lĕ hrom hăng hơdôm jơlan gah kah hăng: tlâ̆o pơgang vaccine, 5 mơta bruă pơgang klin, pơphun dô̆ čơlah... lĕ kiăng hơkrŭ glăi glông bruă lăng tui bruă ia jrao ƀơi sang hră kiăng ngă pơhlôm klă kơ čơđai sang hră ƀơi sang hră.

Tui hăng ƀing juăt bruă, amăng hơdôm hrơi klin Covid-19 ngă tơnap, bruă pơhlôm klă tơlơi suaih pral kơ čơđai sang hră lĕ yôm phăn hloh. Amăng hơdôm hrơi dêh čar ta ngă tui bruă juăt hăng pơhlôm, pơplih tañ, wai lăng klin Covid-19 ba glăi bôh tơhnal, dưi nao sang hră hrăm jing tơlơi kiăng phun lăp djơ̆ mơng čơđai sang hră anun kiăng hmâo jơlan gah tañ hloh pioh ƀing čơđai nao hrăm hră. Bruă pơpha kual kiăng pơsit hmâo pơphun pơtô pơhrăm ƀơi sang hră ƀudah hrăm lăng nao rai mơng ataih lĕ djơ̆ hăng tơlơi ră anai. Khă hnun hai, hrom hăng jơlan gah pơpha kual lĕ dô̆ kiăng hmâo lu jơlan gah ha amăng plĕ pơkon kiăng čơđai sang hră nao sang hră kah hăng: tlâ̆o vaccine, pơphun hrăm dô̆ ataih nao rai, 5 mơta pơgang klin. Tui hăng Kơ-iăng Khua Jơnum min bôh thâo – pơtô pơhrăm mơng Khua pơ ala mơnuih ƀôn sang dêh čar ta Tạ Văn Hạ, khom pơphun glông bruă lăng tui gah ia jrao pioh kơ čơđai sang hră ƀơi sang hră kơjăp lom ƀing čơđai pơwot glăi sang hră hrăm yua kơ “kual mơtah” amăng pơgang, pơgăn klin Covid-19 kơnong kơ hmâo tơhnal pơhlôm ƀiă mơn:

 “Klin ƀu hmâo kual, klin ƀu hmâo anih anom wual lui ôh. Hrơi anai mơtah, samơ̆ pơgi amra jing anih ƀu djơ̆ mơtah dong tah. Yua anun anăp nao tâ̆o hloh ta hmâo jơlan pơkă djơ̆, kah hăng ƀơi Japan juăt hmâo lŏn pơpư̆ ngă, tơdah kah hăng lŏn pơpư̆, ƀing čơđai dưi hrăm lĕ amra hiưm ñu hăng akô̆ tlôn hiưm ñu. Ƀing ta tâ̆o hloh pơdŏng glông jơlan djơ̆ hăng ƀơi sang hră, lom hmâo mơnuih ƀă klin F0 glông bruă amra dưi pơsir hiưm ñu, hăng ƀing čơđai hiưm hơpă, hăng ƀing nai hiưm hơpă”.

Khua pơ ala mơnuih ƀôn sang Nguyễn Anh Trí ăt lăi mơn, amăng mông hơdip hrom, ngă juăt pơhlôm hăng klin Covid-19 lĕ bruă hrăm ăt khom pơmin nao mơn tơlơi pơplih. Čơđai sang hră ƀu dưi hrăm lăng nao rai mơng ataih, hrăm tui tivi na nao tui anun, yua kơ ƀu pơhlôm rah bruă hrăm hăng sui hrơi amra bơdjơ̆ nao tơlơi suaih pral gah drơi jăn, pran jua mơng ƀing čơđai. Yua anun, kiăng ngă gal brơi kơ sang hră pơhlôm pioh amĭ ama čơđai hơđong pran jua ba ană bă nao sang hră:

 “Bruă yôm phăn hloh lĕ pơphun bruă ia jrao ƀơi hơdôm bôh sang hră. Anai jing bruă ia jrao phun. Hrom hăng ƀing nai pơtô pơhrăm, ƀing wai rông čơđai hmâo sa khul mơnuih mă bruă yôm phăn anun lĕ mơnuih mă bruă gah ia jrao. Rim hrơi pơkă lăng pơ-iă drơi jăn, laih anun pơtô brơi ƀing čơđai hơdôm tơlơi, laih dong tơdah hmâo tơlơi đing đăo lĕ pơčrang lăng kơ čơđai”.

Amăng mông jơnum phrâo anai kơplah wah Kơnuk kơna hăng Ding jum pơtô pơhrăm kơ ngă tui kơčăo bruă thun hrăm 2021-2022 amăng hơdôm hrơi klin Covid-19 ngă, Kơ-iăng Khua dêh čar ta ơi Vũ Đức Đam hmâo rơkâo laih Gơnong bruă pơtô pơhrăm gum hrom hăng hơdôm bôh anom apăn bruă pok pơhai hơdôm jơlan gah pơhlôm klă lom čơđai sang hră pơwot glăi sang hră hrăm. Kiăo tui anun, hrom hăng bruă pơtrut tañ rơnoh tlâ̆o vaccine kơ čơđai sang hră mơng 12 thun truh kơ 18 thun lĕ khom pel ĕp glăi, hơkrŭ glăi glông bruă ia jrao ƀơi sang hră, pơhlôm klă ƀơi anih anom hrăm hră kơ čơđai sang hră amăng hơdôm hrơi klin ngă:

“Ƀing čơđai sang hră biă ñu ƀing čơđai amăng hnưr thun akă dưi tlâ̆o vaccine nao hrăm hră, ƀing ta khom hmâo bruă pơgang. Rơkâo Ding jum ia jrao hăng Ding jum pơtô pơhrăm črâo ba pel ĕp glăi, prăp lui glông bruă lăng tui gah ia jrao ƀơi sang hră, ngă hiưm hơpă brơi abih bang ƀing čơđai amăng sang hră leng kơ hmâo tơlơi phun rơđah rơđông kiăng lăng tui tơlơi suaih pral amăng hơdôm hrơi klin ngă, pơhlôm djơ̆ pran jua, ƀing ta nao sang hră lĕ khom pơhlôm hăng amăng sang hră anun lĕ anih anom pơhlôm klă”.

Ră anai, hmâo 23 bôh tơring čar, ƀôn prong brơi čơđai sang hră nao hrăm hră pơ̆ sang hră, 15 bôh tơring čar, ƀôn prong hrăm pơkĕ hrom lăng nao rai mơng ataih hăng hrăm ƀơi sang hră, hơdôm bôh tơring čar, ƀôn prong dô̆ glăi hrăm lăng nao rai mơng ataih hăng tui tivi. Lu anih anom glăk pơplih tui ƀơ ƀrư̆ mơng hrăm ƀơi sang hră lom klin dưi wai lăng. Lu mơnuih juăt bruă lăi lĕ, lom dưi pơphun bruă lăng tui gah ia jrao ƀơi sang hră kơjăp, tô nao rai hluh gah mrô mơng čơđai sang hră hơdôm bôn sang hră hăng glông jơlan djă pioh pơgang pơgăn klin mơng plơi pla hăng pok pơhai ha amăng plĕ hơdôm jơlan pơsir pơkon lĕ amra dưi pơjing anih anom pơhlôm klă kơ čơđai sang hră hơđong pran jua nao sang hră./.

Minh Hường (Ban Thời sự): Čih – Siu H’ Prăk: Pơblang