VOV4.Jarai - Thun tha rơma, laih anun lĕ ling tơhan rơka, samơ̆ ơi Hoàng Biên Thùy dô̆ ƀơi să Hoà Xuân, plơi prong Buôn Ma Thuột, tơring čar Daklak ăt gum hrom klă mơn bruă mơnuih mơnam. Ƀơi anăp tơlơi klin Covid-19 ngă tơnap, hăng bruă mă lĕ Khua Khul ling tơhan hơđăp să, ơi Thùy hmâo laih lu bruă mă sit nik amăng gum tơngan hrom pơgang, pơgăn klin.

Mơng hrơi klin Covid-19 tal 4 gluh đĭ ƀơi să, khă kơnong kơ dô̆ amăng sang samơ̆ tui hăng tơlơi pơhing grŭp Zalo mơng khul ling tơhan hơđăp să, ơi Nguyễn Văn Bằng, dô̆ ƀơi thôn mrô 1, să Hòa Xuân, plơi prong Buôn Ma Thuột, tơring čar Daklak ăt thâo djop mơn kơ tơlơi klin ngă. Ơi Bằng brơi thâo, grŭp Zalo anai yua kơ ơi Hoàng Biên Thùy, Khua Khul ling tơhan hơđăp să Hòa Xuân pơjing hăng lăi pơthâo na nao tơlơi pơhing.

 “Lăi pơhing kơ pơgang, pơgăn klin tui jơlan Zalo ƀơi ayong Thùy hreč biă anun ñu pơtô brơi rơđah biă, mơng tơlơi lăi pơthâo, črâo ba laih anun truh tơlơi klin ngă amăng rim tal leng kơ rơđah sôh kiăng pô thâo hmao tlôn hăng hmao lăi pơhing kơ neh wa”.

Ơi Hoàng Biên Thùy (dŏng tal 2 gah iao) glăk pơtô brơi mơnuih amăng grŭp yua Zalo kiăng thâo tơlơi pơhing klin ngă

Ƀu djơ̆ kơnong kơ lăi tơlơi pơhing hăng pơtô brơi neh wa mă yua Zalo kiăng hơduah ĕp tơlơi pơhing kơ klin kheng ôh, ơi Hoàng Biên Thùy dô̆ hơneč mă nao tơl sang mơnuih ƀôn sang kiăng lăi pơhing. Hăng sa ding kơna grŭp črâo ba pơgang pơgăn klin mơng să, ơi Thùy dưi jao gơgrong ƀơi thôn 1 hăng thôn 4. Rim hmâo tơlơi pơhing, ñu glăi gum hrom hăng grŭp pơgăn klin mơng thôn nao pơtô brơi kơ neh wa. Amai Nguyễn Thị Sơn, dô̆ ƀơi thôn 1, să Hòa Xuân, plơi prong Buôn Ma Thuột ruai glăi:

“Kâo ƀuh wa Thùy hur har pran jua biă nao truh pơ̆ hơdôm anih kiăng lăi pơhing pơgang klin Covid lăi hrom, pơtô brơi tŏng ten kiăng neh wa thâo hiưm ñu hơdră mă yua Zalo. Bơni kơ wa Thùy biă, tha laih, pơdơi lơtret laih samơ̆ ăt dô̆ hur har pran jua mơn hăng neh wa ƀơi anai”.

Hòa Xuân lĕ să hmâo anih anom mơnuih ƀôn sang dô̆ prong, hmâo jơlan nao rai amăng tơring glông tô jơlan mrô 14 hăng hơdôm bôh tơring glông Buôn Đôn, Ea Sup. Amăng să ăt hmâo mơn rơbêh kơ 300 čô mơnuih glăk nao mă bruă pơ̆ hơdôm bôh tơring čar Đồng Nai, Bình Dương hăng ƀôn prong Hồ Chí Minh. Thâo rơđah hơdôm tơlơi anai anun hăng bruă mă lĕ ding kơna grŭp črâo ba pơgang pơgăn klin Covid-19 mơng să, ơi Thùy gum hrom pơphô klă na nao kơ khua git gai hơdră ngă djơ̆ kiăng lăi pơhing, pơtô brơi mơnuih ƀôn sang. Grŭp črâo ba pơgang pơgăn klin Covid-19 mơng să Hòa Xuân ăt ƀuh ƀô̆ na nao mơn ƀơi hơdôm bôh plơi kiăng lăi pơhing, pơtô brơi mơnuih ƀôn sang ngă tui tơpă bruă pơgang, pơgăn klin. Pel ĕp glăi, lăng tui mrô mơnuih mơng hơdôm tơring čar, ƀôn prong pơkon hăng mơnuih mơng anih klin ngă pơwot glăi plơi pla; djru mơnuih ƀôn sang mă Bluezone. Hrom hăng anun, ơi Thùy dô̆ pơjing grŭp Zalo hăng pơtô brơi mơnuih amăng grŭp hăng mơnuih ƀôn sang dong bruă mă yua kiăng gal brơi kơ bruă lăi pơhing pơgang pơgăn klin.

Ơi Hoàng Biên Thùy ră ruai, ñu lĕ sa čô ling tơhan, hmâo găn rơgao hơdôm bruă mă amăng glông bruă wai lăng, git gai anun ñu ăt thâo ƀơ ƀiă mơn kơ hơdră bôh thâo măi mok. Dưi hmâo tơlơi đăo gơnang pơpha mơng Ping gah hăng Khul gưl dlông; drơi pô ñu khă thun tha laih samơ̆ ăt kiăng gum hơgôp mơn pran jua pô yua kơ bruă hrom.

 “Hăng pran jua gơgrong mơng ling tơhan lom pơwot glăi amăng tơlơi hơdip rim hrơi ăt khom pơdah mơn pran jua mơng ling tơhan Wa Hồ, khă hnun hai, hăng sa čô ling tơhan, ling tơhan hơđăp samơ̆ bruă mă mơng Ping gah jao khom ngă giong. Amăng tal klin ngă anai kâo juăt hyu hăng adơi ayong hơdôm grŭp lăi pơhing pơsur kiăng neh wa thâo pơgang pơgăn klin Covid hiưm ñu kiăng klă. Wot lăi pơhing hăng bôh pơhiăp ƀudah pok hơdôm măi mok pôr pơhing, yua telephone kiăng pơtô brơi gơñu thâo hơdră pơgang pơgăn klin, anun lĕ bruă gơgrong mơng pô hrom hăng mơnuih mơnam”.

Ơi Hoàng Biên Thùy ăt gum hrom klă mơn bruă pơsur mơnuih amăng khul gum hrom pơdŏng plơi pla phrâo, pơđĭ kyar bơwih ƀong sang anô̆   

Hăng sa čô ling tơhan 4/4 hăng giăm hmâo 70 thun laih, samơ̆ amăng lu thun rơgao, ơi Thùy gum hrom klă na nao hơdôm bruă ƀơi plơi pla. Tui hăng ơi Nguyễn Đức Thuận, Khua git gai Ping gah să Hòa Xuân, plơi prong Buôn Ma Thuột, rơgao 2 rơwang bruă ngă Khua Khul ling tơhan hơđăp, ơi Thùy pơsur klă bruă khul gum hrom hơdôm bruă yua kơ plơi pla pơphun. Lu mơnuih amăng khul hmâo pơdŏng plơi pla phrâo, pĕ pha lŏn pơkra jơlan, pơđĭ kyar bơwih ƀong sang anô̆ hăng djru ƀing gŏp amăng khul tơnap tap.

Biă ñu, mơng hrơi klin Covid-19 gluh đĭ amăng thun 2020 truh ră anai, khă să Hòa Xuân akă thâo hmâo mơnuih ruă klin samơ̆ bruă pơgang pơgăn klin ƀơi anai dưi đing nao prong biă. Hăng bruă mă lĕ Khua Khul ling tơhan hơđăp, ơi Thùy dô̆ lăi pơhing, pơsur abih bang mơnuih apăn bruă ling tơhan hơđăp ƀơi hơdôm grŭp gum hrom lăng tui plơi pla, kiăng lăi pơhing, wai lăng mơnuih mut tơbiă amăng plơi, ngă tui tơpă hơdôm bruă pơgang, pơgăn klin.

 “Ping gah pơsit prong biă, ñu ngă Khua Khul ling tơhan hơđăp 2 rơwang bruă, khă ră anai thun giăm truh 70 thun laih samơ̆ hăng pran jua hur har, ñu leng kơ ngă gru hlâo amăng hơdôm bruă, biă ñu pơdŏng hơkrŭ đĭ grŭp, pơdŏng ping gah, pơdŏng gong gai. Biă ñu jê̆ hăng anai hloh lĕ să pơdŏng grŭp črâo ba pơgang pơgăn klin amăng anun hmâo ơi Hoàng Biên Thùy gum hrom amăng bruă pơgang pơgăn klin Covid-19 ăt gum hrom lăi pơhing klă mơng”.

Thun tha, drơi jăn ƀu klă hiam, samơ̆ hăng pran jua hăng bruă gơgrong mơng ling tơhan lom pơwot glăi amăng tơlơi hơdip rim hrơi, ling tơhan hơđăp Hoàng Biên Thùy hmâo laih lu tơlơi gum hơgôp hăng plơi pla. Ƀơi anăp tơlơi klin ngă tơnap, pran jua “Kơdŏng klin kah hăng kơdŏng ayăt” glăk dưi đing nao prong lĕ bruă mă mơng ñu jai jing sit nik, tŭ yua, djru gong gai hăng mơnuih ƀôn sang pơgang, pơgăn hăng pơtrut kơdun klin Covid-19./.

            H’ Xíu: Pô čih – Siu H’ Prăk: Pô pơblang