VOV4.Jarai - Dưi hmâo tơlơi tŭ ư mơng Khul wai lăng bruă ruah khua lŏn ia ta, hrơi pơgi, lơ 22/5, 7 bôh puih kơđông pơgang guai lŏn ia hăng Tiểu đoàn pơhrăm tơhan kơdŏng glăi hơdeč hmar, gah Ling tơhan pơgang guai lŏn ia Daklak amra pơphun tañ tal ruah khua pơ ala mơnuih ƀôn sang dêh čar ta tal 15 hăng Khul pơ ala mơnuih ƀôn sang hơdôm gưl rơwang bruă 2021-2026. Truh ră anai, djop bruă prăp lui dưi hmâo laih Ling tơhan pơgang guai lŏn ia tơring čar Daklak gum hrom hăng Jơnum min wai lăng bruă ruah khua tơring čar Daklak prăp lui ngă giong, prăp lui čơkă hơdôm rơtuh čô mơnuih ruah khua “ling tơhan” nao plĕ hră ngă tui tơlơi dưi pô hăng bruă mă pô.

Ƀuh ƀô̆ ƀơi Puih kơđông pơgang guai lŏn ia 737, să Ia R’vê, tơring glông Ea Sup hơdôm hrơi anai, ƀing gơmơi mưn ƀuh ayuh hyiăng mơ-ak klă mơng hrơi jơnum ruah khua. Ƀơi kual ruah khua mrô 11 (Sang jơnum puih kơđông mrô 737), bruă prăp rơmet anih jơnum, pruih ia jrao pơdjai kơman pơgang klin, phuă hră čih anăn mơnuih pioh ruah, hră čih anăn mơnuih ruah khua, kơthung plĕ hră... dưi prăp lui giong laih.

Ling tơhan phrâo mut Hà Văn Piêng 21 thun, gah Puih kơđông pơgang guai lŏn ia 737 ră ruai, anai lĕ tal ruah khua blung a drơi pô kâo dưi gum hrom plĕ hră. Ha blan hăng anai, hơneč mă mông pơdơi tơdơi kơ hơdôm mông nao ngă tơhan, ñu hrom hăng ƀing gŏp ñu nao pơ̆ anih jơnum puih kơđông anih phuă hră čih anăn mơnuih tơbiă anăn kơ khua pơ ala mơnuih ƀôn sang hơduah ĕp tơlơi pơhing lăi kơ ƀing tơbiă anăn kiăng ĕp lăng tŏng ten, ruah mă. Truh mông anai, hrom hăng thâo kơjăp tơlơi pơhing lăi nao kơ mơnuih tơbiă anăn lĕ djop mơnuih amăng anun ăt hmâo čơkă mă mơn hră nao ruah khua, prăp lui plĕ hră amăng hrơi pơgi lơ 22/5.

“Kâo juăt kơsem min tơlơi hơdip bruă mă mơng mơnuih tơbiă anăn kơ Khua pơ ala mơnuih ƀôn sang dêh čar ta tal 15 hăng Khul pơ ala mơnuih ƀôn sang hơdôm gưl rơwang bruă 2021-2026. Kâo čang rơmang ruah mă hơdôm mơnuih djop pran jua klă, hmâo bôh thâo gum hrom Khua pơ ala mơnuih ƀôn sang lŏn ia hăng Khul pơ ala mơnuih bôn sang hơdôm gưl kiăng gơñu djru pran, djru bruă pơdŏng plơi pla, lŏn ia  pơdrong kơtang”.

Khul ling tơhan pơgang guai lŏn ia Daklak gum hrom hăng Jơnum min ruah khua tơring čar Daklak prăp lui ngă giong bruă djru kơ ruah khua tañ ƀơi hơdôm puih kơđông pơgang guai lŏn ia hăng Tiểu đoàn pơhrăm tơhan hơdeč hmar

Thượng tá Nguyễn Xuân Sơn – Pô apăn bruă kơđi čar Puih kơđông pơgang guai lŏn ia 737 brơi thâo, ngă tui tơlơi črâo ba mơng Ƀirô git gai Ling tơhan pơgang guai lŏn ia tơring čar Daklak ăt kah hăng gưl dlông kơ pok pơhai kơčăo bruă ruah khua tañ, lu hrơi rơgao, Ping gah hăng Grŭp črâo bruă puih kơđông pơphun lu mông lăi pơhing kơ Tơlơi phiăn ruah khua, tơlơi hơdip bruă mă ƀing khua pơ ala mơnuih ƀôn sang, tơlơi dưi hăng bruă gơgrong mơng mơnuih ruah khua truh hăng mơnuih apăn bruă tơhan, ling tơhan amăng puih kơđông. Pơkiăo nao 9 čô mơnuih mă bruă mơng puih kơđông gum hrom hăng Jơnum min ruah khua tơring čar Daklak pơdŏng grŭp ruah khua; čih anăn mơnuih nao ruah khua, phuă hră lăi pơthâo tơlơi hơdip bruă mă khua pơ ala mơnuih ƀôn sang kiăng mơnuih apăn bruă tơhan, ling tơhan lăng glăi tŏng ten, ruah khua. Hrom hăng anun, Ping gah puih kơđông ăt črâo ba mơn 100% mrô ling tơhan dô̆ gak, kơtưn bruă hyu tir pel ĕp pơhlôm rơnuk rơnua guai lŏn ia hăng hơdôm anih anom plĕ hră, biă ñu amăng hơdôm hrơi klin Covid-19 ngă glêh tơnap.

“Truh mông anai ƀing gơmơi hmâo prăp lui giong laih djop bruă bơwih brơi kơ ruah khua tañ. Abih bang ƀăng rôn, bôh pia, hră čih anăn mơnuih nao ruah khua hăng khua pơ ala leng kơ dưi yôl hăng phuă giong laih, kơthung plĕ hră ăt ngă giong laih mơn; bruă pơpha hyu hră nao ruah khua ăt hmâo pơpha brơi laih kơ ƀing apăn bruă tơhan, ling tơhan amăng puih kơđông. Rơngiao kơ anun, yua kơ klin Covid-19 ngă glêh tơnap, ƀing gơmơi pơphun tơpă hăng hơdôm bruă iâu pơhrui khul ơi ia jrao ling tơhan pơphun pruih ia jrao pơdjai kơman abih bang kual plĕ hră, hlâo kơ plĕ hră amra ngă tui bruă pơkă lăng pơ-iă drơi jăn, tơlơi rơkâu gôm adung mơbah, dô̆ ataih nao rai kiăng pơphun plĕ hră pơhlôm”.

Khua pơ ala hơdôm Grŭp ruah khua phuă hră čih anăn khua pơ ala pioh kơ mơnuih ruah khua hơduah ĕp tơlơi hơdip bruă mă mơng mơnuih tơbiă anăn

Ling tơhan pơgang guai lŏn ia tơring čar Daklak ră anai wai lăng glông guai lŏn ia ataih rơbêh kơ 74 km, giăm hăng tơring čar Mundulkiri, dêh čar Kur. Tui hăng Đại tá Phạm Hữu Chiến Khua apăn bruă Ping gah Ling tơhan pơgang guai lŏn ia tơring čar Daklak, yua kơ bruă mă pha ra, dưi hmâo tơlơi tŭ ư mơng Khul ruah khua lŏn ia ta, 7 bôh puih kơđông pơgang guai lŏn ia hăng tiểu đoàn pơhrăm tơhan hơdeč hmar gah Ling tơhan pơgang guai lŏn ia Daklak amra pơphun ruah khua tañ hlâo kơ sa hrơi.

Đại tá Phạm Hữu Chiến lăi pơthâo, kiăng pơhlôm bruă ruah khua pơphun pơhlôm ăt kah hăng pơgang tơlơi dưi pô tơlơi rơnuk rơnua guai lŏn ia amăng hơdôm hrơi klin Covid-19 ngă tơnap, puih kơđông gum hrom hăng Jơnum min ruah khua tơring čar Daklak pơdŏng 8 grŭp ruah khua ƀơi 7 bôh puih kơđông pơgang guai lŏn ia hăng tiểu đoàn pơhrăm tơhan hơdeč hmar djru pơgang bruă ruah. Bruă prăp lui kơ tal ruah khua tañ hmâo ngă giong laih, prăp lui čơkă mơnuih ƀôn sang ƀơi hơdôm bôh anom.

“Ƀing gơmơi gum hrom hăng gong gai plơi pla pơdŏng hơdôm anih ruah khua, anih plĕ hră ƀơi hơdôm bôh puih kơđông pơgang guai lŏn ia hăng tiểu đoàn pơhrăm tơhan hơdeč hmar hăng bruă prăp lui hmâo ngă giong laih. Biă ñu bruă mơng khul tơhan pơgang guai lŏn ia dô̆ gak pơgang kơjăp guai lŏn ia, pơgang pơgăn mơnuih mut tơbiă ƀu djơ̆ phiăn amăng hơdôm hrơi klin Covid-19 ngă tơnap, ƀing gơmơi amra pơpha khul mơnuih pơplih nao rai nao pơ̆ hơdôm anih plĕ hră ngă tui bruă ruah khua; hơdôm anih dô̆ gak ataih anih ruah khua lĕ grŭp ruah khua amra ba kơthung plĕ hră pioh ƀing apăn bruă tơhan, ling tơhan ƀơi anih dô̆ gak plĕ hră ruah khua tui djơ̆ tơlơi phiăn pơkă”.

Puih kơđông pơgang guai lŏn ia Daklak hmâo 8 anih anom ruah khua tañ tal ruah Khua pơ ala mơnuih ƀôn sang dêh čar tal 15 hăng Khul pơ ala mơnuih ƀôn sang hơdôm gưl rơwang bruă 2021-2026

Hăng bruă prăp lui tŏng teng kơ gơnam tam, anih anom mă yua pơhlôm rơnuk rơnua, bruă ia jrao amăng hơdôm hrơi klin Covid-19 ngă tơnap mơng Ling tơhan pơgang guai lŏn ia tơring čar Daklak hăng Jơnum min ruah khua ƀơi tơring čar, hơdôm rơtuh čô mơnuih ruah khua mơng ling tơhan pơgang guai lŏn ia ƀơi Daklak hmâo prăp lui laih kơ hrơi jơnum prong, nao plĕ hră ruah khua pioh ruah tơbiă ƀing khua pơ ala mơbruă kơ Khua pơ ala mơnuih ƀôn sang dêh čar tal 15 hăng Khul pơ ala mơnuih ƀôn sang hơdôm gưl rơwang bruă 2021-2026./.

Tuấn Long: Pô čih – Siu H’ Prăk: Pô pơblang