VOV4.Jarai - Jơnum ƀu tui tơđar blung a, Khua pơ ala mơnuih ƀon sang dêh čar tal XV amra pơphun ƀơi Ƀirô Khua pơ ala mơnuih ƀon sang dêh čar, plơi prong jưh jom Hà Nội lơ 4/1/2022 hăng pơđut amăng lơ 11/1/2022. Yua kơ klin Covid-19 dŏ ngă tơnap tap, Khua pơ ala mơnuih ƀon sang dêh čar jơnum lăng nao rai mơng ataih amăng rơwang laih rơgao lăng nao rai mơng Ƀirô Khua pơ ala mơnuih ƀon sang dêh čar hăng 62 grup khua mua pơ ala mơnuih ƀon sang hơdôm tơring čar, ƀôn prong gah gơnong glông. Anai lĕ tơlơi lăi pơthâo hơmâo ba tơbiă amăng jơnum hăng ƀing mă tơlơi pơhing phrâo kiăng kơ prap lui jơnum ƀu tui tơđar blung a, Khua pơ ala mơnuih ƀon sang dêh čar tal XV. Amăng mông jơnum anai, Khua pơ ala mơnuih ƀon sang pơčrông sai hăng amra tŭ yap tơlơi phiăn čih pơkra, pơhrua sa, dua tơlơi amăng 8 tơlơi phiăn. Tơlơi pơsit mă yua lông lăng sa, dua hơdră bruă yôm phara pơđĭ kyar plơi prong Cần Thơ; tơlơi pơsit kơ hơdră prăk kak djru pok pơhai jơlan hơdră hơkrŭ glăi hăng pơđĭ kyar bơwih ƀong huă-mơnuih mơnam; tơlơi pơsit kơ hơdră tuh pơ alin akŏ bruă man pơkra jơlan rơdêh đuăi hmar mơng kual Kơdư - Dơnung gah Ngŏ rơwang thun 2021-2025.

Siu Đoan: Pơblang