VOV4.Jarai - Tơlơi dưi lơ 2 hăng lơ 5/8/1964 jing tơlơi ư-ang mơng hơdôm rơnuk apăn bruă tơhan, ling tơhan ia rơsĭ. Jing anom gum hrom amăng bruă blah ayăt blung a rơgao hăng anai 57 thun, hơdôm rơnuk mơnuih apăn bruă tơhan, ling tơhan Lữ đoàn 170 Kual mrô 1 Ling tơhan ia rơsĭ ƀu huĭ kơ tơnap, glêh glar, gum hrom hơbit pơdŏng lữ đoàn ƀu pơdơi prong kơtang jing khul phun pơgang ia rơsĭ, bul ia rơsĭ gah Pơngŏ mơng lŏn ia.

Hơdôm hrơi anai, khă ayuh hyiăng bơbeč truh yua kơ pơ-iă hang hăng tơlơi klin ruă Covid-19 ngă, mơnuih apăn bruă tơhan, grŭp ling tơhan ia rơsĭ mrô 135, Lữ đoàn 170 ăt pơhrăm mơn bruă mă mơng pô ƀơi tơdrun tum păn. Pơdŏng puih kơđông ƀơi tơring čar Quảng Ninh, Lữ đoàn 170, pơgang, pơgăn rah klin ruă, djă pioh rah khul ling tơhan, gơnam mă yua pioh bruă kơdŏng pơgang. Abih bang mơnuih apăn bruă tơhan, ling tơhan mơng Lữ đoàn ăt ngă tui tơpă mơn hơdôm bruă pơgang, pơgăn klin, biă ñu lĕ tơlơi pơkă, “5 mơta pơgang klin” mơng Ding jum ia jrao. Hrom hăng bruă prăp lui djop jrao pơdjai kơman, pruih jrao pơdjai kơman, gôm adung mơbah hăng pơkă lăng pơ-iă drơi jăn na nao, ƀing gơmơi črâo ba hơdôm bôh ƀirô, anom bruă gưl yŭ pơpha, ruah mơng apăn bruă tơhan, ling tơhan jing hơdôm grŭp, ƀut anet kiăng pơhlôm bruă dô̆ čơlah lom pơhrăm. Mơng khul ling tơhan anai, lu wot ƀat tô mơng Lữ đoàn 170 nao mă bruă, ngă tui truh djop mơta bruă dưi jao. Ngă tui gru grua mơng hơdôm rơnuk mơnuih nao hlâo, ƀing mơnuih apăn bruă tơhan, ling tơhan mơng Lữ đoàn hrơi anai ƀu pơdơi pơhrăm pô, pơđĭ tui pran gơgrong bruă kơđi čar; pơtrut kơtang bruă pơhrăm kiăng pơđĭ tui bôh thâo măi mok, bruă blah hăng bôh thâo prăp lui kơdŏng blah. “Ư-ang, mơ-ak dưi jing mơnuih apăn bruă tơhan, ling tơhan mơng anom bruă gum hrom dưi blah tal blah blung a”, anun lĕ tơlơi pơmin mơng abih bang mơnuih apăn bruă tơhan, ling tơhan ia rơsĭ 135, Lữ đoàn 170.

Thượng uý Trần Văn Cảnh, Khua gơnong bruă ƀat tô 354, ling tơhan ia rơsĭ mrô 135 brơi thâo: Hơdôm tơlơi hrăm, hơdôm gru grua yôm phăn mơng mơnuih nao hlâo lĕ hơdôm tơlơi pơhrăm amăng hơdôm mông dô̆ dŏng ƀong huă mơng ƀat tô kiăng pơtă pơtăn ƀing apăn bruă tơhan, ling tơhan khom pơđĭ na nao bôh thâo, pran gơgrong kiăng ngă giong djop bruă amăng hơdôm tơlơi hơpă.

 “Hăng rơnuk hlăk ai dưi hơdĭp amăng tơlơi rơnuk rơnua hăng čơkă mă hơdôm bôh than dưi ngă mơng tơlơi tuh rơyuh pơsăn drơi, pran jua prong prin mơng hơdôm rơnuk mơnuih nao hlâo, biă ñu dưi mă bruă ƀơi Lữ đoàn hmâo hơdôm bôh ƀat lĕ khul blung a dưi blah tal blah blung a mơng Khul ling tơhan mơnuih ƀôn sang dêh čar Việt Nam, drơi pô kâo ƀuh ư-ang biă hăng ăt ƀuh rơđah mơn bruă gơgrong mơng pô”.

Pơnah phao blah ngă 53-VA thun 2019 ƀơi Lữ đoàn 170

Thiếu tá Phạm Tố Chính, Khua apăn bruă kơđi čar grŭp ling tơhan mrô 135 brơi thâo: hơdôm tơlơi hrăm gru grua amăng bruă blah blung a lơ 2 hăng lơ 5/8/1964 hmâo pơtrut pơsur, pơjing đăo gơnang hăng pơdŏng pran pơsit kơ mơnuih apăn bruă tơhan, ling tơhan ia rơsĭ hrơi anai prăp lui pơsăn drơi pô pioh pơgang tơlơi dưi ƀơi ia rơsĭ, bul ia rơsĭ mơng Lŏn ia.

“Kiăng ngă tui bôh thâo ăt kah hăng bôh thâo mơng hơdôm mơnuih apăn bruă tơhan, ling tơhan blung hlâo lĕ pơtô pơhrăm tơlơi pơmin, thâo dơlăm tơlơi mă bruă, hơdôm tơlơi tơnap glêh glar lom mă bruă, mơng anun pơsit klă bruă mă hmâo jao, ngă gal kơ anih anom mă bruă kiăng ƀing gơmơi dưi ngă tui đut hlah pran tui ngă, ngă tui pran jua gơgrong pô, hrăm tui hăng biă ñu pơtô pơhrăm lom pơhrăm bruă, prăp lui kơdŏng blah ăt kah hăng bruă pơhrăm ƀơi anom, bơkơtuai nao rai tơlơi găn rơgao mơng hơdôm rơnuk nao hlâo ngă tui pran jua gơgrong mơng pô”.

Mơnuih apăn bruă tơhan, ling tơhan Lữ đoàn 170 Kual mrô 1 ling tơhan ia rơsĭ wai lăng măi mok

Hơdôm thun jê̆ hăng anai, amăng tơlơi pơkă pơphun mơng Khul ling tơhan ia rơsĭ mrô 135 hmâo dong lu bôh ƀat tô hăng gơnam mă bruă ƀat tô phrâo rơnuk anai. Hyu pel ĕp dơlăm bruă pơhrăm pô, prăp lui kơdŏng blah hăng pơhlôm bôh thâo măi mok, jing bruă mă na nao mơng khua git gai, črâo ba hơdôm gưl ƀơi Lữ đoàn 170, kiăng anăp nao tơhnal pơkă prong hloh: mơnuih hăng phao kơtoang prăp lui măi mok jing prăp lui giong prong djop bruă mă hmâo jao. Thượng tá Tô Hồng Quân, Khua apăn bruă kơđi čar Lữ đoàn 170, Kual mrô 1 Ling tơhan ia rơsĭ lăi pơthâo: khua apăn bruă tơhan, ling tơhan Lữ đoàn 170 sông kơtang djă amăng pô pran gơgrong kơjăp phik pơgang pô lŏn ia.

 “Pơhrăm, hyu mă bruă ƀơi anom hmâo lu gru grua ling tơhan ăt ư-ang mơn, lữ đoàn ăt pơtrut kơtang mơn kơ ling tơhan mă yua hreč măi mok, lăng yôm pran jua yak rơgao djop tơlơi tơnap, pơdŏng pran kơđi čar kơjăp phik”.

Mơng tơlơi dưi blah blung a đưm hlâo adih, hơdôm rơnuk khua apăn bruă tơhan, ling tơhan hrơi anai hmâo “tô̆ tui” laih, pơđĭ tui pran prong kơtang kiăng pơdŏng đĭ sa Lữ đoàn 170 kơjăp kơtang, djơ̆ hăng anăn iâu khul ling tơhan sông kơtang mơnuih ƀôn sang ƀơi gah hlâo ia rơsĭ, bul ia rơsĭ gah Pơngŏ Lŏn ia.

          Hà Phương: Pô čih – Siu H’ Prăk: Pô pơblang