VOV4.Jarai - Ƀrô ngă lơphet 96 thun Hrơi hră pơhing kač mang Việt Nam (21/6), lu khua mua mơng Ding jum, anom bruă gơnong dlông hăng tơring čar hơmâo nao hơ-ơč hmưi kơ khua mua, mơnuih ngă bruă, ƀing hyu mă tơlơi pơhing, mơnuih dăp hră pơhing, ƀing gư̆ tŭt măi mok kĭ thuâ̆t mơng Gong phun pơtui jua pơhiăp Việt Nam (VOV). Nao čuă hăng hơ-ơč hmưi kơ Gong phun pơtui jua pơhiăp Việt Nam, Khua ding jum, khua Jơnum min wai lăng Djuai ania ơi Hầu A Lềnh čang rơmang, Khua Gong phun jua pơhiăp Việt Nam hăng ƀing hyu mă tơlơi pơhing phrâo, ƀing dăp hră pơhing mơng Gong phun pơtui jua pơhiăp gir ngă hrŏm, djru pôr pơhing tơlơi pơtrun mơng kơnuk kơna kơ abih bang mơnuih ƀon sang djuai ƀiă amăng hrơi blan pơ anăp. Khua ding jum pôr pơhing ơi Nguyễn Mạnh Hùng nao čuă hăng hơ-ơč hmưi kơ VOV lĕ lăi tui anai, hră pơhing khŏm dưi bơkơtưn hăng plang internet; kiăng pơplih phrâo hơdră ngă bruă. Khua ding jum ơi Nguyễn Mạnh Hùng brơi thâo, Ding jum pôr pơhing amra pơsir brơi tơlơi phiăn ngă bruă, hơdră djru kiăng djru anom bruă čih hră pơhing đĭ kyar. Ăt amăng lơ 17/6 mơn, lu grup khua mơng Ding jum,anom bruă Gơnong dlông hăng tơring čar, ƀon prong nao hơ-ơč hmưi kơ Gong phun pơtui jua pơhiăp Việt Nam kah hăng: Ding jum kông ang, Khul pơlir hơbit mơnuih mă bruă Việt Nam, Ding jum pơtom hiăp hăng dêh čar tač rơngiao, Jơnum min mơnuih ƀon sang tơring čar Hải Dương,...

Siu H’Mai: Pơblang