VOV4.Jarai-Tơdơi kơ ƀôn prong Hồ Chí Minh ngă hră pơčrâo mrô 18, amăng anun brơi mơnuih ƀôn sang dưi nao rai laih hăng djơ̆ tơlơi pơkă gêh găl, hơdôm tơring čar Ngŏ Dơnung ăt čih pơkra hơdră brơi mơnuih mă bruă dưi rô nao rai ƀơi hơdôm tơring čar amăng kual. Jơnum min mơnuih ƀôn sang tơring čar Long An tŭ ư tui hơdră pơphun brơi mơnuih mă bruă dưi  nao  rai hăng ƀôn prong Hồ Chí Minh laih anun hơdôm tơring čar Bình Dương, Đồng Nai, Tây Ninh.

Hơdôm tơring čar Ngŏ Dơnung dăp hơdră brơi mơnuih mă bruă dưi nao rai pơ djop tơring čar

Samơ̆, tơring čar Long An rơkâo Jơnum min mơnuih ƀôn sang ƀôn prong Hồ Chí Minh lui hĭ hră ĕp lăng tui gru tơhnal ngă hlâo, kơnong ĕp lăng hră tui tơlơi rơkâo mơ̆ng sang bruă bơwih ƀong sĭ mơdrô yua kơ Gơnong bruă wai lăng jơlan glông hăng pơdŭ pơgiăng amăng kual ngă brơi djop yơh. Jơnum min mơnuih ƀôn sang tơring čar Tây Ninh tŭ ư hăng hơdră čih pơkra anun laih anun djru pơgôp hiăp kơ tơlơi gêh găl tlâ̆o vaccine pơgang boh ƀiă ñu 21 hrơi đôč yap mơ̆ng hrơi tlâ̆o arăt jrum tal sa, ƀudah mơnuih duăm ƀă Covid 19 dưi pơjrao hlao laih amăng 6 blan laih anun boh tơhnal pơčrang kman ƀu ƀuh kman amăng drơi jăn amăng 72 mông dưi rô nao rai.

Tơring čar Bình Dương brơi mơnuih mă bruă apah, ƀing mơnuih kơhnăk dưi pơgiăng hăng  rơdêh rô nao rai mơ̆ng hơdôm tơring čar, ƀôn prong.

Nay Jek: Pơblang