VOV4.Jarai-Hrơi blan rơgao, hrom hăng gong gai kơnuk kơna laih anun lu sang bruă, khul grup tơlơi đăo ƀơi Dak Lak ăt hơmâo lu bruă mă hiam klă, kah pơpha djru ba tơlơi tơnap tap kơ mơnuih ƀôn sang kual bơbeč djơ̆ klin Covid ngă. Amăng tal klin hơđuh glăi tal 4 anai, Khua mua wai lăng tơlơi đăo phrâo hiam Tin Lành tơring čar Dak Lak hơmâo ƀơk pơpha 5.500 anung gơnam kơ mơnuih ƀôn sang kual hơmâo klin, rơnoh prăk 1 klai 500 klăk.

Hrom hăng anun, Jơnum min ia jrao-mơnuih mơnam Khul sang ơi adai tơlơi đăo phrâo hiam Hội thánh Tin Lành Việt Nam Miền Nam ăt djru hơdôm sang anŏ hơmâo mơnuih ƀă klin F0 hăng F1 ƀơi tơring čar Dak Lak hăng lu gơnam djru, rơnoh prăk abih tih 700 klăk prăk.

Thun blan rơgao, lu rơdêh pơgiăng gơnam djă ba lu mơta gơnam djru tơlơi khăp pap mơ̆ng grup ngă bruă mơnuih mơnam-Khul pơ ala đăo phrâo hiam tơring čar Dak Lak hơmâo nao pơ anih mơnuih ƀôn sang dŏ pơčlah, kual arăng guang dar yua Covid 19, jao gơnam djru tơl tơngan mơnuih ƀôn sang 26 boh plơi pla amăng tơring čar Dak Lak. Anun lĕ, hơdôm kual mơnuih ƀôn sang tơnap tap biă mă yua kơ brơi dŏ pơčlah pioh pơgang klin Covid 19.

Grup mă bruă kơ mơnuih mơnam mơ̆ng Khul pơ ala đăo phrâo hiam Dak Lak nao ƀơk gơnam ƀơi sang să Čư̆ Nĕ, tơring glông Krông Ƀŭk

Să Čư̆ Nĕ, tơring glông Krông Ƀŭk, sa amăng hơdôm anih hơmâo klin lu tơring čar  Dak Lak hrơi blan rơgao. Amăng anun, lu sang anŏ ƀơi ƀôn Đrao, ƀôn Dhiă, ƀôn Mui, ƀôn Kdrô lêng kơ guang dar lui soh pioh pơgang klin. Pơ anai, hrom hăng tơlơi djru mơ̆ng lu khul grup mơnuih mơnam mut phung amăng tơring glông, mơnuih ƀôn sang pơ anai, hơmâo grup ngă bruă mơnuih mơnam Khul pơ ala đăo phrâo hiam Tin Lành tơring čar Dak Lak hơmâo jao rơbêh 1460 anung gơnam.

Čih pioh bruă mă tŭ yua anai, ơi Y Hiệp Êban-Khua git gai Ping gah să Čư̆ Nĕ brơi thâo: tơlơi hơdip mơda mơnuih ƀôn sang tơnap tap laih, ră anai hơmâo klin kheng dơ̆ng jai kraih tơnap, tơlơi djru ba, gum hrom mơ̆ng mơnuih čơmah lăp pơpŭ biă mă.

“Să Čư̆ Nĕ gơmơi mơak mơ̆n yua hơmâo tơlơi djru ba mơ̆ng lu khul tơlơi đăo. Boh nik ñu phung đăo phrâo hiam Tin Lành ƀơi Dak Lak hơmâo djru kơ plơi pla gơmơi lu gơnam yôm biă mă, kiăng gum ba ană plơi,  mah ƀiă gơnam samơ̆ pran jua djru anun prong, khăp kơ pô pơkŏn kah hăng khăp kơ drơi jăn ta pô. Kâo pơ ala kơ ping gah să bơni kơ djop khul grup djru anun, biă mă ñu phung đăo phrâo hiam Tin Lành tơring čar Dak Lak”.

Mơnuih ƀôn sang Ƀuôn Jŭng, să Êa Yông, tơring glông Krông Pač

anung gơnam pioh djru

Blan 8 rơgao, tơdơi kơ pơčrang hmar test lăng amăng să hơmâo lu biă mă mơnuih ƀă klin kman sars-cov-2, đơ đam să Čư̆ Bao, plơi prong Ƀuôn Hô, tơring čar Dak Lak khom guang dar abih, ngă tui Hră pơčrâo 16 mơ̆ng Khua dêh čar. Ƀu kơnong tơnap kơ mơnong ƀong huă brơi kơ ană mơnuih ôh, rơ̆k čem rơmô hlô mơnong, bui mơnŭ jing tơnap tap kơtang tit yơh. Ƀơi anăp kơ tơlơi pơhing anun, gong gai kơnuk kơna, djop khul grup mơnuih mơnam laih anun ƀing  čơmah hơmâo nao djru hmao kru. Ơi Y Ban Ayun, Khua plơi ƀôn Krŭm A, să Čư̆ Bao, plơi prong Ƀuôn Hô brơi thâo:

“Kâo mơak mơ̆n yua hơmâo ƀing čơmah djru gơnam kơ mơnuih ƀôn sang. Amăng hrơi blan hơmâo klin phrâo anai kiăng biă mă mơnong ƀong huă rĭm hrơi kah hăng mì tôm, braih, sik, hra,…Bơni kơ khul pơ ala đăo hơmâo mơ-it gơnam djru, kâo pô hai mơak mơ̆n laih anun mơnuih ƀôn sang amăng plơi ăt mơak biă mă mơ̆ng tơlơi djru anai”.

Thâo tong ten jơlan hơdră “Pơkơdong hăng klin kah hăng pơkơdong hăng ayăt mơ̆n” mơ̆ng kơnuk kơna ta pơtrun, hăng tơlơi ngă djru nao rai, ƀing djru đăo phrâo hiam Tin Lành ƀơi Dak Lak hơmâo glăm ba djru hrom ană plơi pla, mơnuih mơnam. Tui hluai tơlơi gêh găl hăng pran jua djru, pô djru prăk, pô pơčruh braih, añăm pơtam, hơbơi pơtơi kiăng ba nao pơ plơi pla mơnuih ƀôn sang hơmâo klin Covid 19 găn rơgao tơlơi tơnap tap.

Khul pơ ala đăo phrâo hiam Tin Lành tơring čar Dak Lak ƀơk gơnam kơ să Čư̆ Êbur, plơi prong Ƀuôn Ma Thuôt

Amai H’Oañ Ayun, djuai ania Êđê dŏ ƀôn Jŭng să Êa Yông, tơring glông Krông Pač hơmâo tơlơi pơmin lĕ, gum tơngan hrom hăng kơnuk kơna amăng bruă pơgang klin Covid 19 lĕ “ta brơi nao ƀu tơguan tŭ glăi ôh”.

“Ngă hrom kơnuk kơna, amăng bruă djru ba mơnuih ƀôn sang bưp tơlơi tơnap tap yua klin Covid 19, ƀôn Jŭng gơmơi ăt iâu pơthưr ƀing djru đăo pơčruh gơnam gum pran jua, pơgôp braih, mì tôm, prăk kăk pioh djru kơ mơnuih ƀôn sang glăk amăng anih tơnap tap yua Covid 19. Gơmơi ngă tui tơlơi iâu pơthưr mơ̆ng khua mua apăn bruă kơnuk kơna hrom hơbit bong glăi klin Covid. Lơ̆m ba nao gơnam djru gơmơi ăt ngă tui djơ̆ tơlơi pơtrun hơdră pơhlôm pơgang klin kơ drơi jăn pô, sang anŏ hăng mơnuih pơkŏn”.

Khua pô pơtô Lemous Philemol-Khua khul pơ ala ƀing djru đăo phrâo hiam Tin Lành tơring čar Dak Lak brơi thâo: dơ̆ng mơ̆ng hơmâo klin Covid 19 hơđuh glăi tal 4 ƀơi Dak Lak, grup mă bruă kơ mơnuih mơnam mơ̆ng Khul pơ ala đăo phrâo hiam Tin Lành tơring čar Dak Lak hơmâo nao ƀơk giăm 5.500 anung gơnam, rĭm anung gơnam hơmâo braih, sa kơthung mì tôm, ia mơsin, ia rơmă, sik hăng rơnoh prăk mơ̆ng 200-300 rơbâo prăk. Abih tih rơnoh prăk rơbêh 1 klai 500 klăk prăk.

Rơngiao kơ gơnam brơi abih kơ mơnuih ƀôn sang dŏ ƀơi kual hơmâo klin, Khul pơ ala ƀing đăo phrâo hiam tơring čar Dak Lak ăt ƀơk gơnam mơ̆ng Jơnum min bruă ia jrao-mơnuih mơnam khul sang ơi adai đăo phrâo hiam Hội thánh Tin lành Miền Nam Việt Nam djru kơ hơdôm sang anŏ hơmâo F0 hăng F1.

Khul pơ ala đăo phrâo hiam Tin Lành tơring čar Dak Lak ƀơk gơnam kơ să Čư̆ Êbur, plơi prong Ƀuôn Ma Thuôt

Rơnoh prăk djru kơ hơdôm sang anŏ ƀing djru đăo  ƀă klin F0, F1 ƀơi Dak Lak hrơi blan rơgao truh kơ 700 klăk prăk, hơmâo braih hăng prăk mơta. Rơngiao kơ anun, Khul pơ ala ƀing djru đăo phrâo hiam tơring čar Dak Lak ăt pơphun brơi grup ơi ia jrao hyu pơtô brơi pơgang tơlơi suaih pral pơdah amăng internet ta juăt lăi pơtô Online, kơ ƀing hlơi kiăng thâo kơ hơdră pơhlôm pơgang klin Covid 19, hơdră wai lăng pơgang mă pô tơdah ƀu bưng ôh ƀă hĭ klin jing F0 ƀudah F1, F2…Khua pô pơtô Lemous Philemol brơi thâo:

“Lơ̆m hrơi mông hơmâo klin Covid 19, boh nik ñu klin hơđuh glăi tal 4 anai ƀă hyu djop anih anom amăng dêh čar. Anŏ bơbeč djơ̆ sat mơ̆ng klin tơnap lu mơta amăng tơlơi hơdip mơnuih mơnam. Hơdôm ƀing djru đăo lu anih gir run hyu čuă jơmư mơ̆ng taih, tơña bla, pơtrut pơsur pran jua tơdruă hăng djru gơnam tam. Hơmâo lu yơh hơdră djru tơlơi khăp pap yôm biă mă gum tơngan hrom kiăng pơgang klin.

Kâo ƀuh ƀing hyu djru lĕ hơmâo ƀing ơi ia jrao, mơnuih apăn bruă, ling tơhan ƀudah ƀing adơi amai đah kơmơi hyu pơƀut mă gơnam djru pioh ba nao pơ kual hơmâo klin. Tơlơi khăp pap djru ba hnun, ngă kơ lu mơnuih dlưh pran găn rơgao amăng bơyan klin kheng anai. Gơmơi ăt djru sa črăn mơ̆n anet pioh kah pơpha tơlơi khăp pap kơ tơdruă”.

Hrom hăng bruă ngă djru ba tơlơi khăp pap, gum mơnuih ƀôn sang amăng kual hơmâo klin găn rơgao tơlơi tơnap tap, hrơi blan rơgao, khul pơ ala phung đăo phrâo hiam tơring čar Dak Lak pơtă pơtăn na nao kơ hơdôm sang ơi adai đăo phrâo hiam djop plơi pla ngă tui djơ̆ tơlơi pơtrun 5 mơta pơgang klin mơ̆ng Ding jum ia jrao hăng lu hơdră pơgang klin Covid 19.  Tơlơi jơnum dưi pơphun mơ̆ng ataih lăng nao rai amăng internet.

Ƀing khua pô pơtô, khua sang yang pơtă pơtăn kơ ƀing djru đăo ƀu dưi pơtum lu mơnuih ôh, biă mă ñu ƀu pơtum ngă tơlơi ngui ngor ƀong huă lu mơnuih, kah hăng tơlơi pơdŏ rơkơi bơnai, djai brŭ. Hơdôm bruă mă tŭ yua sit nik mơ̆ng Khul pơ ala djru đăo phrâo hiam tơring čar Dak Lak hơmâo pơgôp hrom pran jua tơlơi khăp, gum tơngan  hrom amăng bruă pơhlôm hăng pơgang klin duăm ruă Covid 19.

Nay Jek: Poblang