VOV4. Jarai - Ƀrô tal hơdor glăi 50 thun hrơi akŏ pơjing bruă pơtom hiăp kơplah wah Việt Nam hăng India (7/1), amăng lơ 7/1, ƀơi Ƀirô Ding jum pơtom hiăp, Kơ-iăng khua ding jum pơtom hiăp Nguyễn Quốc Dũng hăng Khua anih jưh pơ ala dêh čar India Pranay Vernma hơmâo mơ-it nao rai hră pơpŭ mơng Khua mir sir ơi Nguyễn Xuân Phúc hăng Khua mir sir India Ram Nath Kovind; hră pơpŭ mơng Khua dêh čar ơi Phạm Minh Chính hăng Khua dêh čar India Narendra Modi; hră pơpŭ mơng Khua pơ ala mơnuih ƀon sang dêh čar ơi Vương Đình Huệ hăng Kơ-iăng Khua mir sir, Khua pơ ala mơnuih ƀon sang gơnong glông dêh čar India Venkaiah Naidu hăng Khua pơ ala mơnuih ƀon sang gơnong yŭ Om Birla. Amăng hră mơ-it, ƀing khua mua Việt Nam brơi thâo Việt Nam hăng India ră anai jing gơyut gơyâo, dêh čar ngă hrŏm, đăo gơnong tơdruă hăng bruă khua mua dua bơnah ba tơbiă tơlơi pơsit hrŏm kơplah wah Việt Nam - India kơ pơhlôm rơnuk rơnua, pơdrong asah hăng mơnuih ƀon sang hơmâo tơlơi pơtrut phrâo kiăng pơđĭ kyar tơlơi rô nao rao ngă hrŏm djop mơta, ba glăi tơlơi dưi sit nik kơ Kơnuk kơna hăng mơnuih ƀon sang dua bơnah.

Siu Đoan: Pơblang