VOV4.Jarai - Mơguah anai lơ 27/5, Jơnum min apăn bruă pơ ala mơnuih ƀon sang tal 14 amra pơphun Jơnum lok 56. Tơlơi jơnum yôm hloh amăng tal anai lĕ Khul wai lăng bruă ruah khua dêh čar lăi pơthâo bruă ruah khua pơ ala mơnuih ƀon sang dêh čar tal 15 hăng khua pơ ala mơnuih ƀon sang djŏp gưl 2021-2026. Amăng hrơi mông glăk hơmâo klin Covid-19, bruă ruah khua pơ ala mơnuih ƀon sang dêh čar hăng khua pơ ala mơnuih ƀon sang djŏp gưl 2021-2026 hơmâo pơphun klă hiam, hơmâo lu mơnuih nao plĕ hră. Rơbêh 66 klăk čô mơnuih amăng dêh čar ta nao plĕ hră, dưm dưm rơbêh 95%, amăng anun hơmâo giăm 32 rơbâo grup plĕ hră hơmâo 100% čô mơnuih nao plĕ. Ăt ƀơi mông jơnum anai mơn, ƀing khua pơgôp hiăp kơ hră lăi pơthâo prăk kơna mă yua amăng thun 2019; Lăi pơthâo prăk kăk kơnuk kơna thun 2019 hăng pơgôp hiăp kơ tơlơi lăi pơthâo mơng Kơnuk kơna kơ bruă pơkrem, pơgăn bruă prai prăk thun 2020.

Siu H’Mai: Pơblang