VOV4.Jarai-Mơguah hrơi anai, lơ 24/11, ƀơi Hà Nội, Jơnum mơak Gru grua hiam dêh čar pok pơhai ngă tui Hră pơtrun jơnum ruah khua ping gah dêh čar tal 13, yua kơ ơi Nguyễn Phú Trọng. Tơdơi kơ 75 thun Jơnum mơak gru grua hiam dêh čar tal sa pơphun lơ 24/11/1946 dưi pơphun, Jơnum gru grua hiam dêh čar thun 2021 anai yôm biă mă, kiăng râo pơdưh glăi pran jua khăp kơ lŏn ia djuai ania ta, yak rơbat amăng rơnuk thun phrâo, pơtum ngă bruă pơđĭ kyar hmar hăng hơđong kjăp kơ lŏn ia.

Jơnum anai pioh lu mông lăng glăi boh tơhnal dưi ngă, lơ̆m ngă tui Hră pơtrun jơnum ruah khua ping gah dêh čar ta tal XII amăng bruă wai lăng gru grua thâo thăi ƀudah gru grua hiam, tơlơi adoh suang, hơ̆k hor pran jua…mơ̆ng anun tŭ ư sa hnong anăp ngă bruă, bruă mă phun wai lăng gru grua thâo thăi, gru grua hiam, tơlơi adoh suang hơ̆k hor pran jua mơ̆ng thun 2021-2026, lăng nao truh pơ thun 2045 tơdơi anai.

Hăng tơlơi kiăng hơdôm boh tơhnal dưi ngă laih tơdơi kơ jơnum jing sa pran jua râo pơdưh anŏ kiăng hăng pơđĭ kyar lŏn ia pơdrong asah hing ang, hyuk hyak mơak klă; pơđĭ tui tơlơi pơmin hăng pran jua gum pơgôp djuai ania, ngă hrom pran kơtang rơnuk phrâo.

Nay Jek: Pơblang