VOV4.Jarai - Jơnum min mơnuih ƀon sang plơi prong Buôn Ma Thuột, tơring čar Daklak hơmâo hră pơtrun brơi ngă tui hơdôm hơdră pơgang klin Covid-19 amăng plơi prong. Tui anun, dong mơng 6 mông lơ 6/1 Jơnum min mơnuih ƀon sang plơi prong Buôn Ma Thuột amra brơi ngui tum pơƀut amăng sang , gah rơngiao hluai tui tơlơi sit nik: pơƀut ƀu rơgao 60 čô amăng sa anih hăng rơbêh 90% mrô mơnuih ngui pơƀut hrŏm lơ̆m tlâ̆o 2 ară vaccine ƀudah pơjrao suaih yua ƀă klin Covid-19 ƀu rơgao 6 blan, pơhlôm ngă tui tơlơi pơkă 5k. Kơnong pơphun mơyut jôk, pơdô̆ rơkơi bơnai ƀiă mơnuih đôč, hơmâo gong gai ƀon lan wai lăng. Brơi rơdêh pơgiăng hyu tuai amăng plơi prong hăng nao pơ tơring čar pơkŏn, rơdêh buýt, taxi, rơdêh pơgiăng hyu tuai čuă ngui, hơdôm sang sĭ gơnam ƀong huă lêng kơ dưi pok glăi samơ̆ ngă tui hơdră pơgang klin. Kơnong hơdôm sang sĭ mơñum ƀong pok ƀu brơi rơgao 20 čô mơnuih. Hăng bruă brơi čơđai pơwŏt glăi nao sang hră, rơkâo pơdơi jang jai sang hră čơđai anet. Pơphun bruă pơtô hrăm ƀơi anăp hăng anih 9 hăng anih 12, dong mơng lơ 10/1/2022. Hăng anih hrăm sang hră gưl I,II,III  dŏ glăi ăt pơtô hrăm lăng nao rai mơng ataih.

Siu Đoan: Pơblang