VOV4.Jarai - Mơng lơ 1/7, Tơlơi phiăn hyu dŏ hơdip thun 2020 dưi mă yua, hră akŏ sang, hră dŏ hơdip jang jai dưi yua truh abih lơ 31/12/2022. Ding jum kông ang pơplih hĭ hơdră wai lăng mơnuih mơnam hơđăp lĕ ngă hră akŏ sang wai lăng amăng plang điện tử hơmâo mrô brơi rĭm čô mơnuih, lơ̆n anun, rĭm čô mơnuih amra pơhlôm hơmâo mrô čih anăn amăng plang djă pioh hră pơ-ar dêh čar kơ mơnuih mơnam. Tui anun, mrô anăn mơnuih amra lĕ bruă akŏ kiăng mơnuih ƀon sang dưi mă yua amăng hơdôm bruă ƀơi hơdôm anom bruă kơnuk kơna mơ̆ ƀu kiăng pơdah hră akŏ sang ƀudah hră pơ-ar pơkŏn dong. Bơ hăng hră akŏ sang, hră pơsit anih hơdip jang jai kiăng hơmâo pơkra brơi hlâo kơ lơ 1/7, hơdôm hră anai ăy mă yua kar hăng hră pơ-ar kơ rĭm čô mơnuih kiăng kơ pơsit anih dŏ hơdip truh abih lơ 21/12/2022. Samơ, lơm mơnuih ƀon sang ngă hră pơ-ar ƀơi anih dŏ hơdip, pơplih glăi thun blan tơkeng amăng plang djă pioh hrŏm, ƀudah pơčlah, đuăi mơng anih dŏ hơdip jang jai, čih anăn nao dŏ pơ anih phrâo kah hăng pơplih hơget thơ amra mă glăi hră akŏ sang, hră anih dŏ hơdip jang jai hơmâo ngă hlâo anun, laih dong pơplih amăng plang djă pioh hră pơ-ar dêh čar kơ mơnuih mơnam.

Siu Đoan: Pơblang