VOV4.Jarai-Yap mơ̆ng 12 mông yang hrơi dŏng, lơ 19/7, tơring čar Lâm Đồng brơi abih bang ƀing mơgăt, djru mơgăt rơdêh pơgiăng gơnam ƀu dưi glăi pơ sang anŏ ôh, khom nao dŏ pơ anih pơtum pioh pơgang klin, yua kơ Jơnum min mơnuih ƀôn sang tơring glông hăng plơi prong ĕp brơi.

Lâm Đồng brơi ƀing mơgăt rơdêh, djru mơgăt rơdêh pơgiăng gơnam khom dŏ pơ anih pơtum pioh wai lăng

Hăng bruă pơgiăng gơnam hyu pơ djop tơring čar, kơnong brơi rơdêh pơgiăng gơnam kiăng yua rĭm hrơi đôč, gơnam sĭ mơdrô mă yua rĭm hrơi huăi ngă tui hơdră pơgăn tong ten samơ̆ ngă tui hơdră pơhlôm, pơgang klin djơ̆ tui tơlơi git gai mơ̆ng tơring čar Lâm Đồng.

Laih dơ̆ng, pô mơgăt, pô djru mơgăt rơdêh gơnam sit glăi pơ Lâm Đồng khom pơhaih hơdôm anih ñu nao, anih dŏ glăi kiăng thâo pơgang klin Covid 19 laih anun khom nao dŏ pơ anih pioh kơ hơjăn ƀing gơñu dŏ jăng jai yua kơ khua mua tơring glông pơčrâo brơi. Ƀu dưi glăi pơ sang anŏ ôh, kŏn dưi găn nao amăng plơi pla lơi hŭi ƀă kman klin kơ sang anŏ hăng mơnuih ƀôn sang ieo gah.

Nay Jek: Pơblang