VOV4.Jarai - Lơ 12/11, Ding jum bruă mă-tơhan rơkâo hăng mơnuih mơnam git gai, gum hrŏm hăng hơdôm anom bruă Sang gum hơbit djop dêh čar ƀơi Việt Nam pơphun mông ngă lơphet pơphun blan ngă bruă bơkơnar đah rơkơi hăng đah kơmơi amăng pơgang, pơgăn bruă kơtư̆ juă amăng thun 2021 dong mơng lơ 15/11 truh lơ 15/12 hăng anăn “Pơhlôm brơi tơlơi hơdip mơda, prong tui tơlơi dưi hăng ba glăi tơlơi gal kơ ƀing đah kơmơi hăng ƀing čơđai đah kơmơi kiăng kơ ngă tui hơdră bơkơnar hăng lui hĭ kơtư̆ juă hăng ƀing đah kơmơi”. Bruă pok pơhai blan ngă bruă bơkơnar đah rơkơi hăng đah kơmơi hăng pơgang, pơgăn bruă kơtư̆ juă ƀing đah kơmơi mơng thun 2016 truh ră anai hơmâo ba glăi tŭ yua prong prin, pơhưč lu mơnuih đing nao, gum tơngan hrŏm amăng bruă djru mơnuih mơnam, pơgôp ngă bơkơnar kơplah wah đah rơkơi hăng đah kơmơi amăng djop mơta bruă. Mrô pơđĭ kyar đĭ kơtang hloh, ba dêh čar Việt Nam dong 65 amăng 162 boh dêh čar hăng dong amăng grup dêh čar dưi hloh amăng 5 grup tar ƀar rŏng lŏn tơnah, Sit biă ñu, bruă pơtrun jơlan hơdră pôr pơhing kơ bruă ngă bơkơnar đah rơkơi hăng đah kơmơi truh thun 2030 pơdah pran đing nao yôm phăn mơng Kơnuk kơna hăng bruă pôr pơhing kơ tơlơi anai. Mông ngă lơphet blan ngă bruă thun 2021 iâu pơthưr abih bang bơdjơ̆ nao hăng mơnuih ƀon sang ngă tui hăng pok pơhai bruă sit nik kiăng pơtrut ngă bơkơnar hăng pơgang, pơgăn bruă pơčlah hăng kơtư̆ juă đah kơmơi.

Siu Đoan: Pơblang