VOV4.Jarai - Mông tơña hăng lăi glăi tơlơi tơña ƀơi mông jơnum lok 2, Ƀirô khua git gai pơ ala mơnuih ƀon sang dêh čar tal 15 amra pơphun amăng 2 hrơi ha mơkrah, pơphun mơng mơguah anai lơ 10/11. Ƀing khua ding jum: Khua Ding jum ia jrao Nguyễn Thanh Long, Khua ding jum Mơnuih mă bruă Tơhan rơka hăng Mơnuih mơnam Đào Ngọc Dung, Khua ding jum pơtô hăng pơjuăt Nguyễn Kim Sơn; Khua ding jum Man pơphô akŏ bruă hăng Tuh pơ plai Nguyễn Chí Dũng amra lăi glăi tơlơi tơña. Him lăng mơguah hrơi rơma, lơ 12/11, Khua dêh čar ơi Phạm Minh Chính ngă rơđah brưa bơdjŏ nao hăng lăi glăi tơlơi tơña mơng khua pơ ala mơnuih ƀon sang. Ƀơi mông tơña, lu khua mua hăng ƀing kư tri čang rơmang mông jơnum tal anai hơmâo ngă klă, abih bang gum pơgôp tơlơi pơhiăp, hơmâo hơdră kiăng dưi hơdip hrŏm rơnuk rơnua hăng klin kheng Covid-19; hơkrŭ glăi tơlơi bơwih ƀong huă mơnuih mơnam. Grup jơnum kơ bruă pơgang klin Covid-19 hrơi blan rơgao hăng hơdră pơhlôm pơgang klin, vaccine amăng hrơi blan pơ anăp hơmâo ƀing khua tơña lu biă.

Siu H’Mai: Pơblang