VOV4.Jarai-Tlam mơmŏt lơ 2/7, Jơnum min mơnuih ƀôn sang tơring čar Lâm Đồng jơnum lăng nao rai amăng tivi hăng djop sang bruă kơnuk kơna, Jơnum min mơnuih ƀôn sang djop tơring glông, plơi prong pioh pok pơhai khop bruă mă pơgăn klin tơdơi kơ hơmâo mơnuih ƀă kman Covid 19 amăng tơring čar. Mơnuih ƀă kman sars-cov-2 blung a lĕ đah kơmơi 46 thun, dŏ pơ tơring glông Dă Teh.

Lâm Đồng jơnum ječ ameč amăng mlam pok pơhai hơdră pơhlôm pơgang klin

Pô anun hrom hăng rơkơi ñu, anăn NMH, sĭ boh troh pơ sang čơ phun Hóc Môn, ƀôn prong Hồ Chí Minh mơ̆ng lơ 19/6 truh lơ 25/6. Lơ 26/6. NMH pơgiăng bơnai ñu đĭ rơdêh thut mơ̆ng Hóc Môn glăi pơ sang plơi Phú Hòa, să Mỹ Đức, tơring glông Dă Teh, tơring čar Lâm Đồng. Truh 10 mông 30 mơnit mlam lơ 30/6, bơnai ñu duăm hlor pơ-iă drơi hăng pơtŭk anun nao pơhaih bruă ia jrao ƀơi sang ia jrao să Mỹ Đức.

Anom bruă ia jrao hlong brơi nao dŏ pơčlah mơtam, mă ia khak ba pơčrang hơmâo boh tơhnal ƀă kman sars-cov-2 biă mơ̆n. Tui hăng ơi, Tống Giang Nam, Khua Jơnum min mơnuih ƀôn sang tơring glông Dă Teh, rơkơi bơnai bơn H, lơ̆m glăi mơ̆ng Hóc Môn hơmâo găn rơgao pơ anih pơgăn ĕp duăm ruă tơring glông samơ̆ pơhaih ƀu tong ten ôh.

Laih hmư̆ hing ƀă kman, tơring glông brơi dŏ pơčlah abih găn plơi Phú Hòa hăng pok pơhai bruă tui kru ĕp mơnuih jĕ giăm pơhiăp tom bơn dua anai kiăng pơgăn klin. Ră anai, bruă tui kru ĕp mơnuih hăng mă ia khak pơčrang kman Lâm Đồng ngă tui khut khăt mơtam.

Nay Jek: Pơblang