VOV4.Jarai - Kah hăng ƀing gơmơi hơmâo pôr pơthâo, tơdơi 12 thun pơphun ngă kơčăo bruă pơkra dơnao kŏng ia 4.400 klai prăk Krông Pač gah hlâo ia, truh blan 3 phrâo rơgao,mơnuih ƀon sang giăm dơnao ia hơmâo ba nao pơ pơkŏn. Hăng rơbêh 700 boh sang anŏ, rơbêh 4.000 čô mơnuih kiăng nao dŏ pơ anih phrâo, bruă prăp rơmet jing prong biă. Blung a ƀing ngă bruă kơnuk kơna gơgrong bruă djru ba mơnuih ƀon sang. Khă hnun, yua klin Covid-19 kơtang đơi, ƀing gơñu pioh abih pran pơgang klin. Mông anai, mơnuih ƀon sang pơtrut tui pran jua gum pơgôp, mơnuih nao dŏ hlâo djru ba mơnuih nao dŏ tơdơi, hơđong tơlơi hơdip.

Sang anŏ yă Ma Thị Sìn dŏ ƀơi thôn 9, să Čư̆ San, tơring glông M’Drăk nao dŏ pơ plơi phrâo mrô 1 kơčăo bruă pơkra dơnao kŏng ia Krông Pač gah hlâo ia, să Čư̆ Elang, tơring glông Ea Kar amăng hrơi glăk hơmâo klin Covid-19 kơtang ƀơi dua boh tơring glông anai mơtăm. Ƀing apăn bruă kơnuk kơna hlâo adoh djru ană plơi pơdong plơi phrâo, ră anai abih bang pơƀut pơgang klin laih. Samơ̆ bưng hĭ mơn, sang anŏ nao dŏ hlâo pơ plơi phrâo lĕ hrŏm ha boh plơi, ha boh să, sang anŏ ieo gah mơn yua hnun hơmâo djru ană plơi phrâo nao dŏ pơdong sang. Yua hnun, tơdơi kơ 1 wơ̆t hrơi tơjuh, sang hơmâo pơdong giong laih, sang anŏ ñu hơđong laih ƀơi anih dŏ phrâo.

“Amăng plơi pla, arăng djru ta pơdong sang, pŏng sang, yong đĭ yong truh glêh biă mă yơh. Neh met wa thâo djru ba tui anai jing kâo mơ-ak hĭ yơh”.

Ơi Vàng Seo Pao, kơ-iăng khua plơi ƀơi plơi pơdong phrâo mrô 1, să Čư̆ Elang brơi thâo, thâo hluh bruă pơgang klin amăng mông anai jing yôm biă yơh, lơ̆m ƀing apăn bruă kơnuk kơna glăk pơƀut pơgang klin lĕ neh met wa thâo gum djru nao rai. Hăng năng ai 130 boh sang anŏ nao dŏ pơ plơi phrâo, rim boh sang pơkiăo nao sa, dua čô hăng amăng plơi akŏ pơdong 9 grup. Hơdôm grup anai pơplih nao rai djru ba hơdôm boh sang anŏ phrâo nao dŏ, kiăng ngă hơđong tơlơi hơdip:

“Ăt hơmâo akŏ pơdong 8 grup yong glăm, pơdong sang. Hơdôm sang anŏ rai dŏ tơdơi lĕ gơnang kơ adơi ayong amăng plơi djru ngă sang, huăi tơnap hơget ôh. Pơdong sang lĕ ha hrơi hơmâo 30, 40 čô, ăt pơdong giong mơn, pŏng tôl, pơkra bơbung sang, bơ ngă sang juă glai, pơkra ia yua lĕ pô sang pơkra mă. Pơhmutu hrơi pơgi hơmâo sang anŏ Lý Seo Cháo nao dŏ lĕ ayong Đông hơmâo lăi kơ khua grup laih. Pô ngă khua ăt lăi pơthâo glăi kơ ƀing amăng grup djru ba laih”.

Mơnuih ƀon sang ƀơi plơi phrâo mơng Kơčăo bruă pơkra dơnao ia Krông Pač thượng djru nao rai pơdong sang amăng hrơi glăk hơmâo klin Covid-19 ƀơi Dak Lăk.

Ơi Trần Văn Đông, Kơ-iăng khua anom bruă ngă hmua hăng pơđĭ kyar plơi pla tơring glông Ea Kar, anom bruă čơkă mơnuih nao dŏ tui kơčăo bruă pơkra dơnao kŏng ia Krông Pač thượng, brơi thâo, bruă djru mơnuih ƀon sang pơdong sang dŏ jing plai ƀiă ngă glêh kơ tơring glông amăng mông glăk hơmâo klin, ƀu hơmâo mơnuih nao djru ba mơnuih ƀon sang. Ƀơi anăp, tơring glông hơmâo djru hơdôm grup pơdong sang blơi ia mơñum, gơnam kiăng yua biă mă, khăn gôm ƀô̆ či pơgang klin. Samơ̆ hăng mrô sang anŏ nao dŏ pơ plơi phrâo lu biă, năng ai 230 boh sang anŏ ƀơi plơi phrâo mrô 1, hăng giăm 500 boh sang anŏ ƀơi plơi phrâo pơdong mrô 2, lơ̆m anun klin ăt dŏ hơmâo đôč, Jơnum min mơnuih ƀon sang tơring glông hăng Anom wai lăng kơčăo bruă mơng tơring čar glăk ngă hrŏm, čih pơkra hră pơ-ar djru apah mơnuih djru pơdong sang dŏ. Tơlơi anai pơhlôm hơmâo mơnuih mă bruă, ăt kah hăng kiăng neh met wa mơ-ak pran jua, dưi pơdong plơi phrâo amăng hrơi mông anai:

“Prăk djru ană plơi lĕ ră anai Anom bruă wai lăng kơčăo bruă glăk čih pơkra, tơring glông amra jơnum kiăng pơsit glăi mrô prăk djru. Tơdơi kơ anun, tơdah hơmâo kĭ lĕ gơmơi mă prăk anai apah mơnuih ƀon sang djru pơdong brơi hơdôm boh sang phrâo nao dŏ lĕ 200.000 prăk ha hrơi”.

Amăng hrơi mông klin kheng glăk kơtang, bruă pơdong plơi phrâo mơng kơčăo bruă pơkra dơnao kŏng ia Krông Pač thượng bưp mơn tơlơi tơnap tap. Hăng pran jua thâo gum djru nao rai tơdruă, ană plơi ƀơi anai glăk djru nao rai pơdong sang ƀơi plơi phrâo kiăng tañ ngă hơđong tơlơi hơdip brơi mơnuih ƀon sang ƀơi anai.

Công Bắc: Čih - Siu H’Mai: Pơblang