VOV4.Jarai - Pơgang kjăp guai lŏn ia ƀu djơ̆ kơnong bruă kơ ƀing tơhan wai pơgang guai lŏn ia đôč ôh mơ̆ ăt lĕ bruă kơ mơnuih ƀon sang. Tơlơi jak iâu anai hơmâo puih tơhan wai pơgang guai lŏn ia Đắk Tiên, gong gai, mơnuih ƀon sang să Thuận Hà, tơring glông Đắk Song, tơring čar Dak Nông abih pran jua ngă tui, gum tơngan hrŏm wai lăng kjăp guai lŏn ia ta.

Rĭm blan ha wŏt, ơi Trần Bá Tuyết hrŏm hăng ƀing ding kơna amăng grup wai lăng gong gai ƀơi ƀut plơi 8, să Thuận Hà hrŏm hăng ƀing apăn bruă, ling tơhan Puih tơhan wai pơgang Đắk Tiên hyu rơmet agaih, hyu tir amăng bruă wai lăng kơtuai tui guai lŏn ia. Ơi Trần Bá Tuyết brơi thâo: “Bruă djru wai pơgang hơđong ƀơi guai lŏn ia lĕ kiăng pơgôp pơhlôm rơnuk rơnua dêh čar, pơgang tơlơi dưi mơng bơwih ƀong mơng rĭm čô mơnuih. Yua anun, neh met wa lêng kơ abih pran gum hrŏm hăng ling tơhan hyu tir, hyu rơmet agaih ƀơi guai lŏn ia. Ñu pô ăt juăt hyu pơtô pơblang, lăi pơthâo brơi neh met wa thâo rơđah dong kơ tơlơi gơgrong, tơlơi yôm mơng bruă wai pơgang guai lŏn ia hăng pơgăn ƀing mơnuih ngă soh”

Tui hăng Đại uý Lương Văn Phú, Kơ-iăng khua puih tơhan wai pơgang guai lŏn ia Đắk Tiên, bruă djru hyu tir, čuh rok krô, rơmet agaih ter guai hơmâo anom bruă hăng hơdôm grup wai lăng ngă klă, tŭ yua. Ƀing mơnuih mut hrŏm ăt gir kơtir abih pran jua, lăng anai lĕ kar hăng bruă ƀing gơñu. Laih dong, lơ̆m ngă đang hmua, tơdah ƀuh tơlơi hơget thơ ƀu juăt ƀuh, ƀuh mơnuih ƀu thâo krăn, neh met wa amra lăi pơthâo brơi gong gai, ling tơhan.

Mơnuih ƀon sang hrŏm hăng tơhan hyu tir ter guai lŏn ia

Guai lŏn ia kơplah wah Việt Nam - Kur yua puih tơhan wai pơgang guai lŏn ia Đắk Tiên wai lăng glông giăm 10 km. Pơsit bruă wai lăng kjăp guai lŏn ia ƀu djơ̆ kơnong bruă jao brơi ling tơhan đôč ôh mơ̆ ăt lĕ kiăng hơmâo tơlơi gum hrŏm mơng mơnuih ƀon sang, anom bruă hơmâo đing nao ngă klă lơ̆m pơphô bruă, hrŏm hăng Ping gah, gong gai ƀon lan pơtrut bruă mă amăng mơnuih ƀon sang amăng wai lăng guai, gong guai, pơhlôm rơnuk rơnua brơi plơi pla.

Tui hăng Trung tá Nguyễn Huy Hiếu, Puih tơhan wai pơgang guai lŏn ia Đắk Tiên hăng hơdră jê̆ giăm, thâo rơđah phiăn juăt, tơlơi hơdip kơ neh met wa, mơng gưl Ping gah, khua git gai truh pơ rĭm čô ling tơhan, biă mă ñu lĕ grup hyu pơtrut pơsur mơnuih ƀon sang, amăng hrơi blan ngă tui bruă jao lêng kơ gum hrŏm hăng gưl Ping gah, Gong gai, hơdôm khul grup ƀon lan pơtrut bruă pơtô pơblang brơi mơnuih ƀon sang kơ tơlơi pơsit bơdjơ̆ nao guai lŏn ia.

Amăng hơdôm thun giăm anai, ngă tui tơlơi črâo trun mrô 01 mơng Khua dêh čar lơ̆m pơphun bruă “Abih bang mơnuih ƀon sang djru wai pơgang lŏn ia, pơhlôm rơnuk rơnua ƀơi guai lŏn ia amăng rơnuk phrâo” hăng tơlơi pơsỉ mrô 33 mơng Ding jum kơđi čar kơ “Hơdră wai pơgang lŏn ia amăng rơnuk phrâo”, anom bruă hơmâo ngă klă amăng bruă pơtô pơblang, pơtrut pơsur mơnuih ƀon sang ngă tui jơlan gah, tơlơi črâo trun, hơdră bruă mơng Ping gah, tơlơi phiăn mơng Kơnuk kơna. Laih dong, hơdôm grup arăng jao wai pơgang guai lŏn ia hơmâo akŏ pơjing, mơ̆ ding kơna lĕ mơnuih ƀon sang, amra hrŏm hăng ling tơhan djru wai pơgang guai lŏn ia.

Mơnuih ƀon sang djru wai lăng gong guai

Puih tơhan pơkiăo nao 1 čô mơnuih apăn bruă mut hrŏm hăng Ping gah să hăng pơkiăo ƀing apăn bruă Ping gah glăi jơnum pơƀut hrŏm hăng grup Ping gah ƀơi ƀon lan, djru wai lăng hơdôm sang anŏ. Hơdôm khul grup bruă mă amăng ƀon lan rơkâo ƀing mơnuih arăng đăo gơnang anun lĕ tha plơi, khua plơi kiăng hyu pơtô pơblang, pơtrut pơsur djru brơi mơnuih ƀon sang thâo rơđah hơdôm tơlơi pơglăi ƀơi guai, gong guai kiăng kơ wai lăng, lăi pơthâo hmao tlôn kơ hơdôm tơlơi ngă soh ƀơi guai lŏn ia ….

Thun 2020, ngă tui bruă jao ha amăng plĕ, wai pơgang guai lŏn ia rah, pơgang klin Covid-19 rah, Puih tơhan wai pơgang guai Đắk Tiên akŏ pơjing 3 anih wai lăng hăng gum hrŏm ling tơhan, grup arăng jao hyu tir, wai lăng ƀơi hơdôm glông jơlan mơnuih juăt găn nao rai, gak wai kjăp, ƀu brơi hlơi ôh găn nao rai lŏn ia ča čot.

Puih tơhan wai pơgang guai Đắk Tiên ăt djru brơi mơnuih ƀon sang ngă đang hmua, yuă hơpuă, hyu tơña bla, ƀơk gơnam, khăm pơjrao tơlơi ruă, pơgôp amăng hơdôm keh prăk ƀơi ƀon lan. Anom bruă hơmâo djru brơi rơmô rông brơi sang anŏ ƀun rin ƀơi să Thuận Hà hăng rông ba 1 čô čơđai sang anŏ tơnap tap, djru brơi 2 čô čơđai sang anŏ ƀun rin hrăm hră rơgơi … Hơdôm bruă mă sit nik rĭm hrơi anai mơng ƀing mơnuih apăn bruă, ling tơhan ƀơi Puih tơhan wai pơgang guai lŏn ia Đắk Tiên amra kjăp pran đăo gơnang mơng mơnuih ƀon sang hăng Ping gah, Kơnuk kơna, ling tơhan, pơtrut pran gum djru mơng mơnuih ƀon sang amăng bruă wai pơgang guai lŏn ia.

Ơi Trần Lê Cường khua git gai Ping gah să Thuận Hà, tơring glông Dak Song, tơring čar Dak Nông brơi thâo: “Gum tơngan hrŏm hăng neh met wa man pơdong plơi pla phrâo, ƀing apăn bruă, ling tơhan Puih tơhan wai pơgang guai lŏn ia Đắk Tiên hơmâo djru brơi ƀon lan hăng lu bruă mă sit nik. Amăng anun, amra lăi nao bruă pơjing bruă kơđi čar ƀơi ƀon lan, pơmut lu dong Ping gah phrâo, djru brơi hrơi mă bruă, man pơkra jơlan glông, čroh ia, pok pơhai hơdôm hơbô̆ bruă djru brơi mơnuih ƀon sang pơđĭ kyar tơlơi bơwih ƀong huă. Mơng anun, rĭm čô mơnuih kiăng gơgrong djru wai pơgang lŏn ia, pơhlôm rơnuk rơnua, pơjing pran gum pơgôp mơng mơnuih ƀon sang jai hrơi kjăp phik”.

Siu Đoan: Pơblang